Chefe Suku Batugade, Januario Moises, asina hela akordu implementasaun, asiste direita husi Diretor PNDS, Presidente Autoridade ho Adjunto Komandante PNTL Munisipiu Bobonaro
Suku Batugade, Postu Administrativu Balibo, hanesan Suku Pilotu husi Munisípiu Bobonaro hodi konstrui uma Polísia ba Ofisiál Polísia Suku, programa ida ne’e estabelese liu husi asina akordu entre Presidente Autoridade Munisipál Bobonaro ho Chefe Suku Batugade iha Sede Suku Batugade loron 07/09/2019.
Harii uma polísia suku hanesan polítika ida husi Ministériu Interior ho nia objetivu mak atu hakbesik polísia ba iha komunidade, hasa’e konfiansa komunidade ninia nomos harii páz no estabilidade komunidade sira iha area rurais.
João da Costa, adjuntu Komandante PNTL Munisípiu Bobonaro ne’ebé partisipa iha eventu ne’e, hatete katak uma Polísia Suku ne’ebé atu harii, hanesan fatin ida atu fasilita Ofisiál polísia Suku hodi hala’o ninia kna’ar atu nune’e bele garantia estabilidade seguransa iha komunidade nia leet.
Iha parte seluk Zeferino S. dos Santos, Presidente Autoridade Munisipál Bobonaro iha nia lia menon ba komunidade Suku katak, xave atu fo susesu ba programa sira hanesan ne’e mak ema hotu nia partisipasaun, tantu ema vulneravel, ferik katuas, juventude inklui ofisiál polísia komunitáriu sira atu nune’e bele garantia sustentabilidade.
Diretor PNDS, Paulino Tilman, informa hela asuntu prinsipal programa ne’e liu husi sosializasaun
Antes asina akordu, ba dahuluk programa ida ne’e hetan sosializasaun husi ekipa PNDS Munisípiu Bobonaro atu nune’e komunidade bele apár di’ak lala’ok husi programa ida ne’e, sosializasaun ida ne’e lidera direita husi Kordenadór PNDS Munisípiu Bobonaro, Paulino Tilman.
Programa ida ne’e hetan apoiu finanseiru husi kooperasaun bilateral Governu Nova Zelandia ho Governu Timor Leste, montante orsamentu ba Suku Batugade hodi konstrui uma polísi a ba Ofisial Polísia Suku hamutuk iha $31,277.00 kompostu subsídiu rua : Subsidiu Operasional : $1,750.00 ho Subsídiu Infraestrutura : $29,527.00.
Partisipante ne’ebé partisipa iha atividade ne’e hamutuk ema lima nolu resin kompostu husi Autoridade Lokál munisipál no Postu Administrativu, ekipa PNDS munisípiu, Adjuntu Komandante PNTL Munisípiu ho Komandante Eskuadra Batugade inklui konsellu Suku ho komunidade Suku Batugade.
