Diretora PNDS, Dulce Guterres Junior, apresenta hela modelu programa PNDS iha Konferensia Internasional Desentralizasaun e Poder Lokal
Modelu programa PNDS ne’ebe aprezenta husi Diretora PNDS, Dulce Guterres Junior iha Konferénsia Internasional kona-ba polítika Desentralizasaun Administrativa e Podér lokál hetan apresiasaun husi Konferénsistas sira tanba programa ne’e hanesan programa komunitáriu ne’ebé hetan apoiu direita husi Governu Timor Leste, (Hotel Timor-Dili, 17-18/08/2016).
Diretora Dulce Guterres Junior, iha ninia aprezentasaun hatete katak :“Programa Nasionál dezenvolvimentu Suku la’os projetu, maibé hanesan programa ida ne’ebé mak atu kapasita komunidade sira oinsá bele deside no dezenvolve rasik saida mak komunidade sira hakarak atu dezenvolve iha sira nia Suku.”
Iha Konferénsia Internasional ne’e Diretóra PNDS mos aprezenta modelu programa PNDS nian ne’ebé hala’o durante tinan tolu iha munisípiu 12 no RAEOA, liu-liu oinsá ekipa tékniku sira fo asistensia masimu iha parte tékniku, sosiál nomos finansas, ho asistensia ne’ebé forte programa PNDS bele implementa ho susesu ate ohin loron, tanba iha programa PNDS subsídiu ba suku transfere direita ba konta bankária suku ida-idak no komunidade mak jere rasik orsamentu ne’e iha implementasaun.
Partisipantes sira antusias tebes rona apresentasaun ne’ebe hato’o husi Direora PNDS
Konferénsistas sira liu-liu autoridade munisípiu sira ne’ebé partisipa, apresia tebes ba apresentasaun ne’e, tanba realmente programa PNDS responde duni difikuldade dezenvolvimentu ne’ebé komunidade sira enfrenta iha baze, liu-liu ba iha infraestrutura bázika ne’ebé ho eskala ki’ik hanesan kanál irigasaun ki’ik, ponte ki’ik no estrada, bee mos, aumenta sala eskola nomos seitor relevantes sira seluk.
Programa PNDS ne’ebé governu implementa bele sai hanesan referénsia ida ba iha munisípiu sira hotu, tanba pratika ne’ebé aplika iha programa ne’e mak pratika lolos husi desentralizasaun.
Iha tempu besik nia laran governu sentrál sei fo kompetensia ba autoridade lokál liu husi desentralizasaun Administrativa e podér lokál ba iha munisípiu sira, iha polítika ida ne’e administrativamente governu hahú devolve no deskonsentra ona servisu balu ba iha munisípiu sira atu nune’e munisípiu sira bele dezenvolve rasik sira nia munisípiu ho di’ak liu tan iha futuru mai.
Hafoin apresentasaun, Diretora mos hetan intrevista husi jornalista media nasional ne’ebe halo kobertura
Iha konferénsia ne’e delegasaun husi nasaun hanesan Australia ho Portugal mos fahe sira nia esperensia kona-ba implementasaun podér lokál, informasaun hirak ne’e bele aumenta referénsia ba iha autoridade nasionál nomos munisípiu sira atu nune’e bele dezenvolve polítika ida ne’e ho di’ak liu tan bain hira estabelese desentralizasaun Administrativa e podér lokál iha munisípiu.
Ita hotu hein podér ida ne’e bele intrega ona ba iha munisípiu sira, atu nune’e autoridade sira iha munisípiu iha ona kompetensia rasik, ho sira nia intelektul dezenvolve polítika ida ne’ebé mak governu sentrál intrega ona ba sira atu sira bele dezenvolve rasik sira nia munisípiu, xave atu fo susesu ba iha polítika ida ne’e mak tenke involve ema hotu nia partisipasaun ou dezenvolvimentu ida ne’ebé mak partisipatoriu no kontribuisaun.
