Vice Ministro da Administrasaun Estatal, Tomas do Rosario Cabral Abertura Enkontru Avaliasaun Annual PNDS Munisipiu Dili.
Vice Ministro da administarasun Estatal, Tomas do Rosario Cabral fo atensaun ba Administrasaun Munisipiu sira atu seriu iha gestaun planeamentu orsamentu Munisipiu, deklarasaun bolu atensaun husi Vice Ministro da Administrasaun Estatal nee fo sai bainhira abertura enkontru avaliasaun annual implementasaun programa PNDS ne’ebé implementa iha Munisipiu Dili husi siklu dahulu nian. Enkontru avaliasaun nee hala’o iha salaun enkontru Ministerio Solidaridade Sosial Caicoli Dili, 24/05/2017.
Iha abertura enkontru nee Vice Ministru Administrasaun Estatal, Tomas do Rosario Cabral hateten plano estratéjiku Desenvolvimentu Munisipiu iha pilar rua inportante mak Programa Nasional Desenvolvimentu Suku no Programa Desenvolvimentu Integrado Munisipal, tanba nee autoridade lokal sira no administradór do postu atu partisipa ativo iha inkontru inportante ba programa rua nee, hodi apar didi’ak ho implementasaun programa rua nee.
Vice Ministro Administrasaun Estatal, Tomas Cabral informa mos katak iha tinan 2018, proposta orsamentu husi PNDS no PDIM sei konsentra iha administrasaun Munisipal. Tanba nee atensaun ba administrasaun Munisipiu sira persija seriu iha jestaun planeamentu atu bele hetan konfiansa husi governo sentral, wainhira jestaun la diak mak governo sentrál sei foti fali.
Diretor Delegasaun PNDS Munisipiu Dili, Tadeo Fransisco, dada lia ho Jornalista sira kona-ba progresu implementasaun Programa PNDS.
Entretantu Diretor Delegasaun PNDS Munisipiu Dili, Tadeo Fransisco informa katak projetu sira ne’ebé implementa durante siklu dahuluk barak liu mak projetu bee mos, estrada no ponte, escola, barajen. Projetu hirak nee komunidade sira rasik mak propoin hodi implementa iha sira nia Suku. Diretor nee informa mos durante siklu primeiru implementasaun programa PNDS iha Munisipiu Dili, Komunidade husi Suku tolu nulu resin konstrui ona projetu hamutuk 90.
Aktividade avaliasaun annual nee partisipa husi ekipa jestaun suku inklui autoridade lokal hanesan chefe suku, administradór postu no funsionáriu PNDS Munisipiu Dili. Iha avaliasaun nee Suku ne’ebé identifika sai nudar manan nain ba implementasaun Programa PNDS siklu dahuluk mak Suku Makadade, nudar manan nain primeiru Lugar, segundu lugar Suku Makili, no terseiru lugar mak Bikeli, suku tolu refere husi Postu Administrativo Atauro.
