Amu Parokia Liquisa Bensaun ba Estrada Rural Betaun iha Suku Maumeta.
Estrada ne’e konstrui ho orsamentu ne’ebé aloka liu husi programa PNDS faze 3 siklus 2, iha suku Maumeta, Munisípiu Liquisa, estrada refere finaliza ona no hetan inaugurasaun husi Administrador Munisípiu Liquisa, Domingos da Conseção dos Santos iha sesta feira 24/01/2020.
Administrador Munisípiu Liquisa, Domingos da Conseção dos Santos ne’ebé inaugura projetu ne’e Agradese no orgulhu ba Ekipa PNDS husi Nasional, Munisípiu to Postu no Ekipa Jestaun Suku Maumeta ne’ebé servisu makas hodi konstrui estrada rurais betaun ne’e ho kualidade ne’ebe diak, rejultado ne’e hatudu katak ekipa jestaun suku sira inklui badaen sira serbisu ho fuan hodi dezenvolve sira nia suku.
Administrador Munisipiu Liquisa Akompanha Husi Chefe Departemento Implementasaun PNDS Nasional Ofisialmente Inaugura Estrada Rurais Suku Maumeta.
Nune’e Administrador Munisípiu Liquisa, reafirma ba komunidade katak Programa Nasional Desenvolvimentu Suku fo lisaun lubuk ida ba komunidade atu iha kapasidade organizativa hodi hakbi’it komunidade liu husi sira nia partisipasaun iha prosesu Desenvolvimentu iha Nivel Suku. servisu ida ne’e nudar parte ida husi projeitu komunitaria ne’ebé PNDS hala’o iha suku hotu-hotu inklui suku Maumeta.
Agostu Barreto dos Santos, nudar komunidade ne’ebé sai benefisiáriu ba projetu ne’e agradese tanba ho PNDS bele rejolve sira nia difikuldades ne’ebé sira enfrenta, nudar benefisiáriu sente kontente tebes, tanba konstrusaun Ponte no Estrada ida ne’e sai hanesan prioridade as liu iha suku Maumeta espesialmente iha aldeia Nartutu ne’e maioria komunidade sira preokupa atu konstrui nune’e preokupasaun hirak ne’e bele rejolve ho prezensa implementasaun Programa PNDS iha sira nia suku, Ho finalizasaun projetu ne’e komunidade iha bairo ne’e sente katak estrada ne’e bele fasilita sirkulasaun komunidade sira hala’o negósiu iha Mercado.
Admnistrador munisipiu Liquisa, Domingos da Conseção dos Santos Hala’o Intervensaun iha Seremonia Inaugurasaun Estrada Rurais iha Suku Maumeta, Aldeia Nartutu.
Konstrusaun Rehabilitasaun projeitu estrada rural iha suku Maumeta Aldeia Nartutu ne’e ho total orsamentu $34,093.85. ho orsamentu ne’e halo konstrusaun Estrada rural ho medida luan 3 Metru naruk 608 Metru, Ponte Ki’ik ida ho nia medida luan 3 Metru no naruk 4 Metru, Moru satan Be’e/Bronjong 25 Metru no valeta/ saluran 250 Metru.
Seremonia inaugurasaun Estrada Rurais Betaun ne’ebé kompostu husi item balun hanesan Ponte, drainajen no estrada rurais betaun hetan mos bensaun husi Amu Lulik parókia Liquisa no asiste husi Administrador Munisípiu Liquisa, reprezentante Diretora PNDS Nasional, Diretor PNDS Munisípiu Liquisa, Administrador Postu Bazartete, Diretora Nasional Rekursu Humanu Ministeriu Saude, Diretora MSS Munisípiu Liquisa, Komandante Munisípiu Liquisa, Ekipa Husi PARTISIPA (Cardno), Funsionariu PNDS Munisípiu Liquisa no Komunidade Suku Maumeta.
