Sua. Exa Prezidente da Repúblika Timor Leste, Sr. Taur Matan Ruak akompaña husi Sua. Exa Sekretáriu Estadu Dezenvolvimentu Lokál (SEDL),

Sr. Samuel Mendonça, inagura projetu PNDS iha Suku Maluru, Postu Administrativu Quelica, Baucau. (12/12/2014)

Iha diskursu inagurasaun ne’e, Sua. Exa Prezidente da repúblika apresia tebes no kontente ho partisipasaun tomak komunidade ninia ne’ebé kontribui iha programa PNDS. “Involvementu no partisipasaun sidadaun ninia mak sai hanesan xave ba dezenvolvimentu nasaun ida nia”, hato’o husi Sua. Exa Prezidente da Repúblika, Sr. Taur Matan Ruak.

Prezidente RDTL defende governasaun ida ne’ebé hakbesik an ba povu no PNDS sai hanesan ezemplu konkretu governu ninia hodi hakbesik liu ba komunidade atu nune’e bele responde difikuldade dezenvolvimentu ne’ebé komunidade rural enfrenta, tanba iha programa PNDS komunidade mak iha responsabilidade tomak atu implementa programa no jere rasik sira nia subsídiu suku ne’ebé governu aloka ba.

Sua. Exa SEDL, Sr. Samuel Mendonça ne’ebé partisipa iha inaugurasaun ne’e, fo onra bo’ot tebes ba Sua. Exa Prezidente da Repúblika, tanba bele partisipa iha serimónia Inaugurasaun projetu PNDS. Inaugurasaun ida ne’e hanesan eventu ba dahuluk ne’ebé partisipa direitamente husi Sua. Exa Prezidente da Repúblika.

Prezensa programa PNDS iha suku Maluru, ajuda tebes komunidade. Laura Epifania Freitas, hanesan Sekretáriu EIP hatete katak :

Laura Epifania F. hato’o apresiasaun programa PNDS iha Suku Maluru, Quelicai-Baucau

“Ami Suku Maluru oan susar tebes-tebes ba atendementu sobre ami nia saudi liu-liu ba ami nia inan feto sira ne’ebé isin rua bainhira atu partus/tu’ur ahi, ferik-katuas ne’ebé ida ona labele la’o dook, maibé agora ami kontente tanba ami rasik iha ona postu siska, ami fiar katak ba futuru ami sei iha rasik doutór ou enfermeira ne’ebé bele servisu besik liu ami nia komunidade”.

Durante konstrusaun projetu PNDS iha Suku Maluru, dirije direitamente husi maluk feto sira, tanba husi ema na’in 11 ida ne’ebé involve iha ekipa jestaun suku (EJS) ida ne’e maioria mesak feto (feto 10 no mane 1). Maske hetan dezafiu barak iha implementasaun programa PNDS maibé   komunidade ho konxiénsia tomak konsege konstrui ramata duni projetu ne’ebé sira deside.

PNDS hanesan programa komunitáriu ne’ebé governu Timor Leste deside sai hanesan programa nasionál. Programa nee konsentra liu ba dezenvolvimentu iha nivel suku no aldeia hodi tau atensaun ba difikuldade dezenvolvimentu infraestrutura báziku ne’ebé komunidade sira enfrenta.

Suku Maluru hanesan suku ida ne’ebé implementa PNDS iha faze ba dahuluk, no projetu 3 ne’ebé konstrui iha suku ida ne’e mak hanesan :

1. Konstrusaun foun ba postu siska iha aldeia Loilubu ho montante orsamentu dolar amerikanu 17,002.65,
2. Konstrusaun foun sentru komunitáriu iha aldea Samafanu ho montante orsamentu dolar amerikanu 15,149.90 US, no
3. Projetu rehabilitasaun bee mós iha aldeia Samarogo ho montante orsamentu dolar amerikanu 11,847.45 US.

 

 

 

 

 

© Copyright 2014 Programa Nasional Dezenvolvimentu Suku