Kanal Irigasaun be ba natar no kolam ikan
“Irigasaun ne’ebé halo husi PNDS, laos utiliza deit ba natar, maibé utiliza mós ba hakiak ikan, manu rade nomos kuda modo”, hatete husi Luis Gonzaga, hanesan komunidade husi Suku Lahae, Aileu.
S.E SEDL, Samuel Mendonca ho nia komitiva Inaugura Irigasaun iha Suku Lahae, Aileu
Irigasaun ida ne’e komunidade mehi kleur ona atu halo rehabilitasaun maibé suku kbiit la to’o, ho prezensa programa PNDS ajuda tebes komunidade sira hodi tau hanoin hamutuk no deside rehabilitasaun irigasaun mak sai hanesan prioridade importante tanba komunidade suku ida ne’e maioria moris ho vida agrikultura.
Lider komunitária ho komunidade tomak sente orgullu tebes ho PNDS tanba iha programa ida ne’e fó duni benefísiu ba sira.
“Ha’u kontente ho PNDS tanba diferente ho programa sira seluk, iha PNDS komunidade mak identifika rasik sira nia nesesidade, sira mak implementa no laos kompañia mak implementa”, hato’o husi Vasco Rosario Fatima, hanesan Xefe Suku Lahae.
Iha konstrusaun projetu rehabilitasaun ne’e hetan rezultadu di’ak tebes tanba iha implementasaun komunidade partisipa ho masimu, alende ne’e iha programa ida ne’e eduka mós komunidade sira oin sá sira bele jere programa ho di’ak iha sira nia suku.
Abel da Conceicão, hanesan Diretor delegasaun PNDS distritu Aileu, iha nia intervensaun hatete katak : “Iha PNDS laos atu responde deit ba infraestrutura maibé kapasita mós rekursu umanu”.
PNDS hanesan programa komunitária ne’ebé fó oportunidade atu kapasita mos rekursu umanu komunidade sira nian oinsá sira bele jere programa hotu tantu hahú husi planu, implementa, jere rasik subsídiu suku ne’ebé governu aloka ba sira.
Luis Gonzaga hanesan benefisiariu esplika ba Sr. DGDL Miguel Pereira, kona ba benefisia husi iragasaun
Suku Lahae, hanesan suku ida ne’ebé implementa PNDS iha Faze 1, Subsídiu suku ne’ebé governu aloka ba iha suku ida ne’e ho montante $45,000.00 no subsídiu ida ne’e fahe ba subsídiu rua : $5,500.00 ba operasaional atu apoiu servisu administrative komunidade ninia, $39,500.00 aloka ba iha infraestrutura. $39,500.00 ba infraestrutura ne’e aloka ba projetu rua mak hanesan :
- $18,263.32 aloka ba projetu Rehabilitasaun Irigasaun ho distánsia metru 500;
- $21,236.68 aloka ba projetu Konstrusaun Sentru Komunitariu Multi Propózitu
Be’e husi irigasaun ida ne’e utiliza ba iha natar mais menus hectare 5 resin, kolam ikan, nomós kantadeiru ba kuda modo. Benefísiu husi irigasaun ida ne’e mais menus xefe de família 106 resin.
