Forum ONG Timor Leste (FONGTIL) ofisiálmente aprensenta programa PNDS hanesan kandidatura atu hetan prémiu husi United Nations Public Service Award (UNPSA) ka organizasaun Nasaun Unidas ba servisu publika, (24/10/2014).
“FONGTIL ho vontade tomak aprezenta PNDS ba kandidatura tanba PNDS hanesan programa ho konseitu foun no aplikavel, no komunidade rasik mak deside, planea, implementa, hodi kontinua halo manutensaun”. Hato’o husi Arsenio Pereirra da Silva, Diretór Ezekutivu FONGTIL.
Kritériu organizasaun ida atu kandidata programa modelu hanesan programa PNDS ba iha UNPSA mak organizasaun ne’e tenke independente katak la indika ligasaun ruma intermus ajuda finanseiru husi governu ka ajénsia relevante ba iha sira instituisaun. FONGTIL hanesan órgaun independente ida ne’ebé kredibel tebes no libre husi konsekuénsia ida ne’e, mesmu asina akordu hamutuk ho governu atu halo monitorizasaun ba programa PNDS maibé la iha indikasaun apoiu fundus ruma husi governu ka ajénsia relevantes ne’ebé mak koopera iha programa ida ne’e.
Programa PNDS hanesan programa komunitáriu ne’ebé ninia prinsípiu mak ejijénsia prioridade mai husi komunidade sira, garantia transparansia no akontabilidade, nomós inklujaun sosiál katak feto no mane iha oportunidade hanesan atu foti desizaun no hetan benefísiu husi programa, inklui mós grupu vulneravel no ema ho defisiente.
PNDS hetan apresiasaun pozitivu tebes husi komunidade internasionais bainhira S.E Ministru da Administrasaun Estatal, Jorge da Conceição Teme ho Coo-Chefia DGDL, Miguel Pereira de Carvalhao halo apresentasaun iha korea de Sul iha fulan junu liu ba, bainhira organizasaun ida ne’e fó sai rezultadu vensedor ba UNPSA. Apresiasaun husi komunidade internasionais ba programa PNDS, tanba PNDS foka liu ba dezenvolvimentu komunitáriu ne’ebé iha implementasaun responsabilidade tomak husi komunidade tantu halo planu, implementa, jere orsamentu, no halo manutensaun.
UNPSA hanesan organizasaun mundiál husi Nasoins Unidas ne’ebé tau matan ba konseitu Dezenvolvimentu nasaun ne’ebé governu implementa hodi fo atensaun liu ba dezenvolvimentu komunitáriu no moris komunidade nia iha area rural.
Espera katak ita hotu hein rezultadu ida ne’e, tantu programa PNDS atu hetan prémiu ou lae husi organizasaun mundiál ida ne’e, maibé importante liu mak programa ida ne’e bele hetan apresiasaun husi mundu tomak.
