Sekretariadu tékniku PNDS hala’o sorumutu kordenasaun nasionál iha Salaun STAE, Dili (14-15/08/2014). Objetivu husi enkontru ida ne’e atu kria kordenasaun entre nivel nasionál ho distritu, atualiza progresu programa PNDS no mós troka ideia kona ba dezafiu ne’ebé akontese iha implementasaun PNDS iha terrenu.
Ekipa Tekniku PNDS hamutuk ho FST sira dezenha hela planu mensal
Enkontru ida ne’e hanesan atividade regular ne’ebé akontese iha kada fulan, hanesan bain-bain, iha enkontru ne’e unidade hotu tantu ekipa PNDS nasionál nomós ekipa PNDS husi distritu hato’o apresentasaun liu-liu kona ba progresu atuál ne’ebé akontese iha terrenu.
Dulce Guterres Junior, hanesan mós Diretora Operasional PNDS iha nia intervensaun nia optimista ho servisu ekipa ne’ebé agora iha. Nia hatete katak : “Maski dezafiu barak ne’ebé ita hasoru iha implementasaun Programa PNDS ba fase hotu-hotu maibé ho Ekipa ne’ebé forte ita sei bele resolve dezafiu hirak ne’e ho di’ak”.
Iha sorumutu kordenasaun ne’e maizumenus ema 30 resin mak partisipa, kompostu husi Diretór nain rua, Chefe departamentu na’in 5 husi ST PNDS nasionál, Diretór Delegasaun PNDS husi Distritu 13, nomós funsionáriu tékniku husi PNDS, alende ne’e partisipa mós Sra. Melinda Mousaco, hanesan Senior Adviser – Field Support Team National Program for Village Development Support Program ka Apoiu ba Programa Nasionál Dezenvolvimentu Suku nomós ekipa FST distritu 13.
Iha implementasaun programa PNDS ne’e hetan mós apoiu ka asistensia tékniku husi governu Australia liu husi Ekipa Apoiu Terenu ka ekipa Filed Support Team (FST).
