Vise Ministru Administrasaun Estatal Jacinto Rigoberto Gomes de Deus, Ofisialmente tesifita ba inagurasaun Be’e Mos iha Suku Estadu.
Reprezentante Nunu Governu liu husi Vise Ministru Administrasaun Estatal, Jacinto Rigoberto Gomes de Deus akompaña husi autoridade lokál no Parseiru PNDS husi PARTISIPA hala’o inagurasaun ba projetu Programa Nasional Dezenvolvimentu Suku siklu VII tinan fiskal 2025 ho tipu projetu kontrusaun Be’e Mos sistema Gravitasaun iha Aldeia Limho, Suku Estadu, Munisipiu Ermera.
Be’e Mos Sistema Gravitasaun ne’ebe implementa liu husi PNDS, Siklu VII.
Iha inagurasaun ne’e Vise Ministru Administrasaun Estatal, Jacinto Rigoberto Gomes de Deus agradese tebes tanba projetu Be’e mos hanesan nesesidade ida ne’ebe importante tebes ba moris lo-loron nian iha ne’ebe deit. Vise Ministru MAE mos hatutan katak Nunu Governu apresia ba povu iha suku Estadu hakarak halo dezenvolvimentu ne’ebe importante tebes ba komunidade iha suku ida ne’e ho esforsu makas hodi kopera servisu hamutuk ho ekipa PNDS nune’e bele realiza
konstrusaun sistema Be’e mos nudar nesesidade prioridade ho kualidade hodi fornese Be’e mos ba komunidade sira iha Suku Estadu.
Vise Ministru Administrasaun Estatal foto hamutuk ho ekipa PNDS Munisipiu Ermera.
Iha fatin hanesan Vise Ministru MAE rona mos komunidade sira nia expresaun kontente ba fasilidade baziku ne’ebe mak komunidade sira hetan hanesan Bee mos no konstrusaun no infraestrutura sira seluk tan. Alende ne’ mos Autoridade lokal suku Estadu hateten, agradese tebes ba IX Governu ne’ebe bele atende nesesidade komunidade suku estadu liu husi Programa Nasional Dezenvolvimentu Suku ne’ebe ohin loron komunidade suku estadu sente rasik hanesan Be’e Mos ne’ebe durante tinan naruk sai difikuldade ba komunidade suku estadu maibe ohin loron ami sente kontenti tamba bele asesu ona Be’e Mos liu husi PNDS ne’ebe bele rezolve ona prolema komunidade nian liu husi infraestrutura baziku.
Projetu konstrusaun Be’e Mos Sistema Gravitasaun iha suku Estadu ne’e liu husi orsamentu Governu tinan fiskal 2025 ho alokasaun orsamentu $37,135.68 ho balansu $590.80 ne’ebe halo tanki kaptasaun unidade 2, tanki rezervatorio unidade 3 no torneira publiku unidade 17.
Seremonia Inagurasaun ne’e partisipa husi reprezentante Presidente Autoridade Munisipiu Ermera, reprezentante Diretor PNDS Munisipiu Ermera, Komandante Esquarda PNTL Postu Ermera, Chefe Suku, parseiru husi PARTISIPA, ekipa servisu tekniku PNDS no komunidade iha Suku Estadu Ermera.
