Ministru Administrasaun Estatal Tomás do Rosário Cabral, ofisilamente tesifita ba inagurasaun projetu Be’e Mo’os.
Reprezentante Nono Governu liu husi Ministru Administrasaun Estatal Tomás do Rosário Cabral akompaña husi Prezidente Autoridade Rejiaun Administrativa Espesiál Oé-cusse Ambeno, Rogerio Tiago de Fatima Lobato, Vise Presidente parlamentu Nasionál Deputada Maria Terezinha Viegas, Sekretariu Ezekutivu PNDS, Amandio Paulino Gastão Do Rosário De Sousa hamutuk Chefe Gabinete MAE, Benigno da Cruz ofisialmente hala’o inagurasaun ba projetu Be’e Mo’os iha Suku Nipane, Postu Administrativu Pante Makassár.
Ministru Administrasaun Estatal Tomás do Rosário Cabral, halo intervensaun iha seremonia inagurasaun Be’e Mos.
Projetu Be’e Mo’os ne’ebe implementa iha Suku Nipane ne’e obra hosi PNDS halo perfurasaun no kanalizasaun ba komunidade no benefisiáriu uma kain hamutuk 60, inklui eskola EBF Sakato, Postu Saúde no Sede Suku mak sei uja. enkuantu projetu refere ne’e ezekuta planu asaun anuál tinan 2022.
Iha intervensaun, Ministru Administrasaun Estatal, afirma, horseik Ha’u hasoru malu ho Xefe Suku sira, Ha’u mai lori ho lista ida, tinan 2022 projetu sira ne’e remata hotu ona inklui Uma NAroman ba Povo, balsansu husi osan ne’e $15.250 tenke fila fali ba Kofre Estadu no projetu sira ne’e implementa no atinji 100%.
Komunidade Suku Nipane partisipa iha seremonia inagurasaun Be’e Mos.
Ministru Administrasaun Estatal, mos hatutan katak “Ha’u-nia vizita segundu ka terseiru, Ha’u hakarak sira projetu sira ne’e tenke remata, tamba xefe suku sira iha responsabilidade administrasaun, tau ema nain-4 iha suku ne’e responde ba ministériu. Projetu PNDS 2023 seidauk remata, maibé horseik xefe suku sira dehan mai Ha’u katak 23 Novembru projetu 2023 tenke remata, no Projetu PNDS 2024 tenke remata iha 16 Dezembru”.
Iha fatin hanesan, Prezidente Autoridade RAEOA, agradese ba Ministru Administrasaun Estatál Sr. Tomás do Rosário Cabral ba kooperasaun servisu entre RAEOA ho Governu sentrál liu husi programa Nasionál Dezenvolvimentu Suku hodi kanaliza Be’e Moos ba komunidade iha Suku Nipane.
Autoridade RAEOA kompromete sei servisu hamutuk ho PNDS hodi bele hadi’a infraestrutura báziku sira iha área rurál atu fasilita komunidade iha suku no aldeia.
Partisipa iha seremónia inagurasaun ne’e maka membru Autoridades, Diretor Nasionál MAE, Xefe Suku, Xefe Aldeia, ekipa PNDS Nasionál no RAEOA, Komandante PNTL, Lia Nain no komunidade Suku Nipane.
