Escola Bazika Filial (EBF) ne’ebe hetan Inagura husi ise ministru Administrasaun Estatal Jacinto Rigoberto Gomes de Deus.
Reprezentante Nono Governu liu husi Vise ministru Administrasaun Estatal Jacinto Rigoberto Gomes de Deus Akompaña husi Sekretáriu Ezekutivu PNDS, Amandio Paulino Gastão Do Rosário De Sousa, Inagura projetu Be’e Mos no Escola Bazika Filial (EBF) iha Suku Maumeta, Postu Administrativu Bazartete, Munisipiu Liquisa.
Torneira Be’e Mos ne’ebe oferese Be’e ba Komunidade Suku Maumeta.
Iha inagurasaun ne’e Vise Ministru Administrasaun Estatal hatete, PNDS hanesan programa ida ne’ebe diak tebes, ne’ebe konstrui ona Eskola ba alin estudante sira hodi utiliza no aprende iha Edukasaun Formal, no konstrui tan Bee Mos ba komunidade Suku Maumeta Aldeia Mertutu ne’ebe durante halerik ba nesidade baziku hanesan be’e Mos agora bele utiliza ida ne’e bele dehan katak pertinente tebes, tanba ida ne’e maka preokupasaun komunidade nian ohin finaliza ona.
Vise Ministru Administrasaun Estatal husu atu nafatin apela ba komunidade no joven sira iha Suku Maumeta tau matan nafatin ba Eskola no Bee mos ne’e atu nune’e bele utiliza ba tempu naruk. “Hanesan membru governu, Ha’u bele dehan katak Ha’u kontente, orgullu no apresia tebes ba imi, tanba mezmu que imi hela iha ne’e programa PNDS nian imi konstrui hotu kedas no la abandona Ha’u bele dehan katak imi servisu fo liman ba malu, unidade harmonia tanba hakarak dezenvolve ita-nia rai, ne’e duni Ha’u lori Governu nia naran, agradese ba partisipasaun komunidade sira nian, i agradese mós ba ekipa Jestaun Suku sira, Xefi Suku no Komunidade sira hotu.
Partisipa iha seremonia inagurasaun projetu Be’e Mos no Escola Bazika Filial (EBF) ne’e Presidente Autoridade Munisipiu Liquisa, Komadante FFDTL Munisipiu Liquisa, Komadante PNTL Munisipiu Liquisa, Autoridade Lokal, estudante Escola Bazika Filial (EBF) no komunidade suku Maumeta.
