Iha loron 20 de Juñu 2014, Governu Timor Leste liu husi Sekretáriu Estadu Dezenvolvimentu Lokál Samuel Mendonça halo inaugurasaun ba projetu PNDS rua maka hanesan projetu sentru komunitário no projetu bé mós iha Suku Mota Ulun, Disitritu Liquica.
SEDL fó parabéns ba ema hotu ne’ebé involve iha projetu PNDS inklui komunidade, Chefe suku no aldeia sira, ekipa PNDS no Administrasaun Distritu Liquisa, no mós dehan: “Governo Timor Leste prepara osan atu hari konstrusaun ka infraestrutura ne’ebé sai prioridades ba komunidade. Tanba ne’e husu ba komunidade hotu, atu responsabiliza hodi tau matan ba infraestrutura hirak ne’ebé hari tiha ona, tanba ita maka nain ba projeitus hirak ne’e.”
Sentru Komunidade Multi Propózitu Foun iha Aldeia Mota Ikun, Suku Mota Ulun
Projetu PNDS iha Mota Ulun mak parte ‘pilotu’ ka dala primeiru prosesu PNDS la’o. Maibé Chefe suku Mota Ulun, Agusto de Jesus, afirma katak projetu PNDS sira ne’e hetan partisipasaun no kontribuisaun barak husi komunidade iha aldeia Classo no Mota Ikun, suku Mota Ulun, no laiha dezafiu signifikativu ne’ebé komunidade sira hasoru durante ne’e tanba buat hotu la’ o ho di’ak.
“Ami agradese, tanba komunidade bele asesu ba sentru komunitário ne’ebe hari tiha ona. Nudar autoridade lokál ha’u kontente katak programa ida ne’e bele la’o nafatin durante tinan ualu nia laran, atu nune’e bele hadi’ak komunidade nia moris,” dehan Chefe Suku Mota Ulun.
Reprezentativu husi Embaixada Australia Kathy Richards, mós marka prezensa hodi inaugura fasilidade foun ne’e. Governu Australia fó apoiu hodi formasaun ba fasilitador PNDS sira ne’ebé serbisu hamutuk ho komunidade hodi realiza programa hirak ne’e. Iha ninia diskursu iha lia Tetun nia dehan, “Governu Australia sente orgullu atu serbisu hamutuk ho Governu Timor-Leste iha programa nasionál ida ne’e. Liu husi apoiu Australia ba program PNDS, agora ita bele haree ona ninia rezultadu iha nivel komunidade hanesan sentru komunidade ida ne’e.”
Projetu bé mós hala’o iha Aldeia Classo. Projeitu ida ne’e utiliza orsamentu cerca de 21 mill dolares Amerikana no benefísiu uma kain hamutuk 216.
Projetu Sentru komunitário hari iha Aldeia Mota Ikun ne’ebé bele utiliza husi komunidade hamutuk uma kain 124. Projetu ida ne’e gasta cerca de 18 mill dolares Amerikana.
