Presidente Autoridade Munisipal Ermera, akompanha husi Reprezentante Sekretariado Tekniku PNDS, koa Pita simbolu inaugurasaun projetu estrada iha Suku Humboe, Munisipiu Ermera
Rehabilitasaun Estrada ne’e konstrui ho orsamentu ne’ebé aloka liu husi programa PNDS faze 3 Siklus 2, iha suku Humboe, Munisípiu Ermera, estrada refere finaliza ona no hetan inaugurasaun husi Presidente Autoridade Munisípiu Ermera Jose Martinho, iha sesta feira 03/07/2020.
Iha intervensaun Presidente Autoridade Munisípiu Ermera, Jose Martinho orgulhu no agradese tanba governu liu husi PNDS bele halo saida mak nia bele deminui difikuldades ne’ebe komunidade enfrenta, nudar exemplu kik ida mak estrada ne’ebé ita halo ona liu husi Programa Nasionál Dezenvolmentu Suku ne’ebé konstrui estrada rurais betaun ne’e ho kualidade ne’ebé diak, rejultadu ne’e hatudu katak ekipa sira iha iha vontade ne’ebé diak no servisu makas hodi konstrui estrada rurais hodi dezenvolve sira nia Suku.
Presidente Autoridade Munisipiu Ermera hateten Desenvolvimentu sei lao nafatin, komunidade sira presija asesu estrada husi aldeia to Munisípiu ho programa Nasional Dezenvolvimentu Suku fo lisaun lubuk ida ba komunidade atu iha kapasidade organizativa hodi hakbi’it komunidade liu husi sira nia partisipasaun iha prosesu Desenvolvimentu iha Nivel Suku. servisu ida ne’e nudar parte ida husi projeitu komunitaria ne’ebé PNDS hala’o iha suku hotu-hotu inklui suku Humboe.
Tunila Galucho Trindade, nudar komunidade ne’ebé sai benefisiáriu ba projetu ne’e agradese tanba ho PNDS bele rejolve sira nia difikuldades ne’ebé sira enfrenta, nudar benefisiáriu sente kontente tebes, tanba konstrusaun pakote hanesan Estrada, Drenajen, Bareira, Box Culvert no Bronjong ida ne’e sai hanesan prioridade as liu iha suku Humboe espesialmente iha aldeia Borohei. Ho ida ne’e mak komunidade suku Humboe Aldea Borohei maioria deside atu konstrui projetu ne’e atu bele rejolve difikuldade ne’ebe sira enfrenta. Tuir komunidade sira preokupasaun hirak ne’e bele rejolve ho prezensa implementasaun Programa PNDS iha sira nia suku, Ho finalizasaun projetu ne’e komunidade iha bairo ne’e sente katak estrada ne’e bele fasilita sirkulasaun komunidade sira hala’o negósiu iha Mercado no bele fasilita inan isin rua sira bele lao ba konsulta iha postu.
Media sira halo intervista ho Presidente Autoridade Munisipal Ermera, konaba Projetu ne’ebe inaugura
Konstrusaun Rehabilitasaun projeitu estrada rural iha suku Humboe Aldeia Borohei ne’e inísiu iha fulan Agostu 2019 no termina iha fulan Novembro 2019, ho total orsamentu $33,912,531 ho gastus $31,652,33, ho balansu 2,260,20 ho orsamentu ne’e halo konstrusaun pakote hanesan, Estrada rural, Drenajen, Bareira, banjir Limpax, Box Culvert no Bronjong.
Hola parte husi Serimónia inaugurasaun rehabilitasaun no Konstrusaun ne’e mak Presidente Autoridade Munisípiu Ermera, Administrador Posto Ermera Villa, Reprezentante Polisia Postu Ermera Villa, Liñas Ministerial Munisípiu Ermera, Reprezentante Diretora PNDS Nasional, Diretora Delegasaun Munisípiu Ermera, Chefe Suku no Chefe Aldeia Funsinariu PNDS Nasional no Munisípiu Ermera no Komunidade Suku Humboe.
