Vice Ministra das Finansas, Sara Lobo Hamutuk ho Embaisador Australia Peter Robert Asina Akordu Apoiu Husi Governo Australia, iha Edifisiu MOF, Aitarak Laran Dili.
Apoiu finanseiru husi governo Australia ba Governo Timor Leste ne’e formaliza liu husi asina akordu entre Embaisador Australia iha Timor Leste Reprejenta Governo Australia no Vice Ministra Finansas, Sara Lobo reprezenta Governo Timor Leste, akordu ne’e halao iha Edifisiu Ministeriu das Finansas Aitarak laran Dili, 26/05/2020.
Liu husi akordu ne’e governo Australia sei fornese asistensia finanseiru hamutuk miliaun Hitu dolar Australia kampara ho dolar Amerika hamutuk miliaun 4,4. Orsamentu ne’e sei uza hodi finansia projetu infraestrutura komunitariu liu husi Programa Nasional Desenvolvimentu Suku (PNDS), hodi nune’e bele rekopera ekonomia komunidade durante periodu Pandemia covid-19 ne’ebe afeira Mundu tomak inklui Timor leste.
Embaisador Australia, Peter Robert iha nia intervensaun hateten apoiu ne’e sei fo direita ba komunidade sira liu PNDS tanba Programa ne’e nudar programa fantástiku ne’ebe foka ba infraestrutura basiku hanesan be’e mos, centru saude, sistema irigasaun no projetu imfraestrutura basiku sira seluk ne’ebe ho kualidade diak ho kustu ki’ik.
Nune’e Embaisador Peter espresa katak Australia kontente tebes atu kontinua fo apoiu direita ba Timor Leste liu husi parseria ne’ebe iha entre Nasaun rua atu bele alinha ba sistema nasaun rasik, nasaun mak lidera no sistema nasaun nian (Country Own, Country Lead, Country system) hodi alkansa objektivo desenvolvimentu tuir objektivo nasaun Timor Leste.
Foto Hamutuk Entre Embaisador Australia, Peter Robert, Vice Ministra Finansas, Sara Lobo no Diretora Nasional PNDS, Dulce Guterres Junior Inklui Estrutura Ministeriu das Finansas no PNDS.
Entretanto Vice Ministra Finansas, Sara Lobo hateten, liu husi akordu ne’e governo Australia sei inzekta provolta 4,4 milaun dolar Amerika ba programa nasionál desenvolvimentu suku hodi simplifika no redús prosesu no prosedimentu administrative sira ne’ebe kompleksu ho nune’e bele iha asesu ba prosesu tranferensia fundus finansiamentu ba komunidade ho lalais.
Vice Ministra hateten suku sira iha Teritoria laran sei benefisia direitu atu asesu ba fundus ne’e hodi finansia infraestrutura basiku hodi kontribui ba seguransa alimentar, be’e mos, saude no seluk tan. Ikus liu hodi governo no Povo Timor Leste nia naran hakarak hato’o profunda gratidaun ba apoiu sira ne’ebe governo Australia fo liu-liu iha situasaun difisil hanesan agora Mundo inklui Timor Leste enfrenta Pandemia Covid 19.
