Vice ministru Administrasaun Estatal, Abilio Jose Caetano Akompanha husi Presidente RAEOA no Embaxador Australia Ofisialmente Inaugura Irigasaun Be’e ba Natar iha Suku Beneufe, RAEOA.
Projeitu Irigasaun Be’e ba Natar ne’ebé konstrui iha Aldeia Manan, Suku Beneufe, RAEOA ho orsamentu Governu ne’ebé aloka liu husi Implementasaun Programa Nasional Dezenvolvimentu Suku (PNDS) ofisialmente inaugura husi Vice Ministru Administrasaun Estatal Akompanha husi Presidente RAEOA, Embaxador Australia no asiste husi komunidade suku refere. Aktividade ne’e halao iha loron (07/02/2020).
Vice Ministru Estatal, Presidente RAEOA, Embaxador Australia Hamutuk ho Partsipante Sira Direitamente Vizita Irigasaun Be’e ba Natar iha Aldeia Manan, Suku Beneufe, RAEOA.
Konstrusaun Irigasaun Be’e ba Natar ne’e hanesan prekupasaun ida ne’ebé maíoria komunidade Aldeia Manan, Suku Beneufe halerik tanba iha suku refere komunidade moris ho vida Agrikultura. Implementasaun Programa PNDS iha Suku Beneufe ne’ebé Implementa husi Ekipa implementasaun projetu no komunidade ne’e iha projetu 2 mak hanesan Irigasaun Be’e ba Natar no Rehabilitasaun Estrada Rural iha Aldeia Oelnanoe, Suku Suniufe, Postu Administrativu NITIBE, RAEOA.
Irigasaun ne’e konstrui hodi distribui be’e ba natar hektares 9 ho nia naruk 1016m, as 1m ho luan kraik 40cm no luan leten 80cm ho total orsamentu $41,447.50 ho gastu $40,065.00 no nia balansu hamutuk $1,382.50 ne’ebé mak iha kontabankaria suku.
Embaxador Australia Peter Roberts Hala’o Intervensaun iha Inaugurasaun Be’e ba Natar iha Suku Beneufe.
Vice-Minisitru Administrasaun Estatal, Abilio Jose Caetano hafoin Inaugura Irigasaun ne’e haktuir ba komunidade suku Beneufe katak liafuan murak mak Dezenvolvimentu tengke iha estabilidade, paz, unidade, nune’e tenke hamutuk sai ema trabalhador no servisu nain para nune’e bele hetan dezenvolvimentu tanba povo hakarak mak Be’e Mos, Estrada, Elektrisidade, Sanementu nesidade báziku ne’ebé komunidade presija.
Ho nune’e Vice-Ministro Abilio Jose Caetano apela ba Chefe Suku, Chefe Aldeia no komunidade suku Beneufe katak projetu ne’ebé inaugura ona labele tinan oin ita la uja ona maibe tenke iha nia kontinuidade no susteinabilidade tanba fo benefisu ba ita hotu.
Irigasaun Be’e ba Natar iha Suku Beneufe, RAEOA Ne’ebe Inaugura husi Vice Ministru Estatal.
Iha fatin hanesan Embaxador Australia ba Timor-Leste, Peter Roberts ne’ebé partisipa iha inaugurasaun ne’e hato’o nia sentimentu kontente tebes tanba tinan hira nia laran bele servisu hamutuk ho Governu Timor Leste Liu husi Programa Nasional Dezenvolvimentu Suku ne’ebé governu Australia fo apoiu liu husi asistensia Tekniku ba ekipa PNDS sira, Peter Roberts hatutan mos katak iha inaugurasaun Be’e ba Natar ne’e hanesan fatin ida ne’ebé premeiru ves ida hakat mai iha RAOEA liu-liu iha suku Beneufe.
Hola parte husi Serimónia inaugurasaun ne’e mak Vice Ministru MAE, Presidente RAOEA, Embaxador Australia, Komandante Polisia RAOEA, Liñas Ministerial RAOEA, Chefe Gabinete MAE, Diretor Geral, Diretor/a Nasional MAE, Diretora PNDS Nasional, Diretor Delegasaun PNDS RAOEA, PARTISIPA, Autoridade lokal RAOEA, Funsinariu PNDS Nasional no RAOEA no Komunidade Suku Beneufe.
