Estrada Ne’ebe loke ho Osamentu PNDS iha Suku Manetu, Munisipiu Ainaro Ne’ebe liga ba Aldeia Kirkoli no Aldeia Maulai.
Suku Manetu Postu Administrativu Maubise Munisipiu Ainaro, kategoria hanesan Suku ne’ebe remotas ho distansia 24 kilo metru husi Postu Administrativu Maubise, Distansia entre Aldeia Kirkoli liga ba Sede Suku Manetu kuaze kilo metru 7 ho total habitantes aldeia kirkoli hamutuk uma kain 73 no Mane 197, feto 241 total 438 pesoas, entretanto distansia entre Aldeia Maulai liga ba cede Suku Manetu ho distansia besik kilo metru 8 ho total habitantes hamutuk uma kain 115, kompostu husi mane 358, feto 405 total hamutuk 763.
Desde hahu husi tempu kolonial Portugues to’o Timor ukun a’an, Aldeia rua refere iha Suku Manetu laiha transporte ne’ebe bele asesu tama to’o iha Aldeia laran nune’e husi Suku Manetu atu vijita Aldeia rua refere tenki uja kuda hodi halo movimentu ba mai, Aldeia Kirkoli no Maulai iha potensia bo’ot ba produsaun Lokal hanesan Kafe, Sabraka, Koto, Modo, Fore-rai no seluk tan, maibe asesu estrada difikulta komunidade sira bele lori sira nia produtu hirak ne’e ba iha merkadu. Iha dia 21 de marsu de 2019 wainhira realiza Enkontru iha Nivel Suku hodi Re-verifika prioridades ne’ebe hala’o ihfulan marsu 2017 liu husi aktividade PIIM (Plano Investimentu Integrado Munisipiu), ikus mai prioridade konaba estrada husi aldeia rua ne’e komunidade hili nudar prioridade iha implementasaun PNDS tinan 2019, nune’e iha 30 de abril de 2019 husi parte tekniku PNDS halo survey Estrada ba aldeia kirkoli no Maulai hodi implementa.
Alcino Mendonca nudar Chefe Aldeia Kirkoli Espresa sentimentu kontenti tanba prioridade loke Estrada foun konsege realiza, nune’e Chefe aldeia ne’e kompremete katak iha futuru depois de projeitu ne’e finaliza no entrega ona ba sira karik Estrada at, rai monu ou ai ruma monu nia hamutuk ho nia komunidade bele tau matan hodi hadia no halo manutensaun karik estragus makas ou Estrada kotu total maka sira sei liga ba governu hodi ajuda.
Komunidade Aldeia Kirkoli no Maulai Suku Manetu Kontenti ho Estrada Ne’ebe Konstrui iha Sira nia Suku.
Entretanto Antonio Martins nudar veteranus agradese ba PNDS, tanba Estrada ne’ebe PNDS hari’i iha sira nia Suku, liliu Komunidade Aldeia rua refere hanesan preveleziu no Orgulhu bo’ot ida ba sira bele lori sira nia produtu local ba fa’an iha merkadu, nune’e mos sasan hirak ne’ebe sira tula husi maubisse bele lori to’o iha sira nia uma, veteranus ne’e konta tuir sira nia sofrementu katak dezde tempu malae mutin to’o indonesia nia tempu ami aldeia rua ne’e ema haluha, ami agradese tebes ba PNDS tamba ho Programa PNDS bele loke netik Estrada tama to’o ami nia aldeia iha Tempu Timor Ukun a’an.
