Vice Ministru Administrasaun Estatal, Abilio Jose Caetano Hala’o Intervensaun iha lançamentu Perfurasaun Be’e Mos iha Aldeia Akanunu.
Lançamentu perfurasaun Be’e Mos ne’ebe lança husi Vice-Ministru Administrasaun Estatal, Abilio Jose Caetano no akompanha husi Embaixador Australia ba Timor-Leste, hala’o iha Postu Administrativu Cristo-Rei, Aldeia Akanunu 29/08/2019.
Perfurasaun be’e mos ne’e uja orsamento PNDS ne’ebé aloka ba Aldeia Akanunu iha tinan 2019, projetu ne’e rasik propoin husi komunidade rasik atu bele responde sira nia difikuldades kona-ba falta be’e mos.
Ekipa Engeneiru PNDS Munisipiu Dili, Hala’o Esplikasaun Kona-ba Perfurasaun Be’e Mos ba Vice Ministru MAE, Embasador Australia no Partisipante iha Aldeia Akanunu.
Vice-Minisitru Administrasaun Estatal, Abilio Jose Caitano hafoin lansamento hateten haktuir ba komunidade sira katak nesesidade kona-ba Be’e mos iha mundu sai ona nudar deklarasaun global atu komunidade iha mundu hetan asesu ba Be’e mos no saneamentu ho dignu inklu mos komunidade iha Timor-Leste.
Ho nune’e Vice-Ministro Abilio Jose Caetano hateten Timor-Leste iha obrigasaun atu bele tau atensaun ba nia komunidade hodi asesu Be’e mos no saneamento ho dignu, nune Governu Timor-Leste iha komitmentu atu investe maka’as, tanba ne’e Ministeriu Administrasaun Estatal halo ona Negosiasaun ho Governu Australia kona-ba Tanki Rejervatoriu Be’e hodi rai Be’e Mos ba tempu naruk, Governu Australia iha komitmentu atu fo nia assistensia tekniku ba Tanki rejervatoriu Be’e Mos no tekniku sira ne’e sei selu husi Governu Australia.
Embaixador Australia ba Timor-Leste, Peter Roberts ne’ebé partisipa iha lançamentu nee deklara sentimentu kontenti tanba bele partisipa iha eventu ne’e, hodi hare rasik kondisaun komunidade Aldeia Akanunu presija tebes Be’e Mos,tanba Be’e Mos importante ba moris lorloron komunidade nian.
Iha oportunidade ne’e mos Embaixador Australia ba Timor-Leste Peter Roberts deklara katak Governu Australia iha komprimisio nafatin atu kontinua ninia parseiru ne’ebé forte ho Timor-Leste liu husi Programa Dezenvolvimentu Suku PNDS.
