Partisipante Treinamentu rona hela intervensaun husi Diretora PNDS, Dulce Guterres Junior konaba implementasaun fatin halimar
Ministériu Edukasaun hamutuk ho Sekretariadu Tekniku PNDS realiza treinamentu tékniku fatin halimar iha Centru Treinamentu Tibar, abertura ba treinamentu nee hala’o iha Timor Plaza Dili.
Treinamentu tékniku ba funsionáriu PNDS ne’ebé hala’o kna’ar nudar fasilitador tékniku, finansas no sosial, atu oinsá bele apar didi’ak obra ba fatin halimar ne’ebé sei implementa iha territóriu Timor Leste. Treinamentu nee mos inklui Engineiru Munisípiu, no kontabilista Munisípiu.
Treinamentu tékniku nee alende hetan materia partisipante sira mos hetan treinamentu pratika oinsá bele hatene etapa monta obra fatin halimar.
Diretora Nasional PNDS, Dulce Guterres Junior iha abertura ba treinamentu husu ba partisipante sira atu utiliza didi’ak tempu ne’ebé iha hodi apar didi’ak materia atu nune’e bele hala’o obra fatin halimar ho di’ak.
Engineiru Munisipiu no Fasilitador Tekniku pratika hela oinsa halo montanjen fatin halimar
Diretora PNDS Nasional, bolu atensaun ba funsionáriu sira atu seriu no atensaun hodi simu materia treinamentu tanba iha esperensia implementasaun projetu Uma Ofisial Polisia Suku buat balun sei failha, nune’e persija atensaun masimu atu bele apar didi’ak materia hodi implementa fatin halimar ba labarik sira ho kualidade ne’ebé di’ak.
Entretanto Diretora Nasional Ensino Pre Eskolar Ministériu Edukasaun, Abelina da Costa hateten fatin halimar ba labarik sira importante atu lori labarik sira ba aprende laos deit aprende hakerek no le’e maibé nudar meus atu forma sira nia karakteristiku hodi prepara sira molok tama ba eskola primaria, tanba ne’e persija prepara kondisaun ne’ebé di’ak atu labarik sira bele aprende ho di’ak.
Hafoin abertura treinamentu iha Timor Plaza, treinamentu fahe ba grupo tolu mak hanesan grupo Finansas, Sosial kontinua treinamentu iha Timor Plaza no grupo tékniku ne’ebé kompostu husi fasilitador tékniku no Engineiru Munisipiu kontinua hala’o treinamentu pratika oinsá hahú obra fatin halimar iha centru treinamentu Tibar.
