Uma Postu Polisia iha Metinaro neebe hetan inagura husi embaisadora Nova Zelandia ba Timor Leste
Uma Ofisial Polisia Suku (OPS) ne’ebé hetan apoiu orsamentu husi governo Nova Zelandia ba Polisia Nasional Timor Leste, hodi ajuda knar polísia Suku iha baze, iha loron 29/06/2018, ofisialmente inagura husi embaisadora Nova Zelandia no akompanha husi Komandante Geral PNTL no Diretora PNDS.
Uma nee konstrui uja sistema PNDS ho nia medida 7X8 m2 kompostu husi kuartu deskansa rua kompletu ho fasilidades inklui haris fatin ida kompletu ho instalasaun bee mos no sala serbisu polísia suku nia.
Diretora PNDS, Dulce Guterres Junior iha intervista ho journalista sira hateten ho sistema PNDS ami konsege implementa ona pilotu uma sanulu resin hat ne’ebé konstrui iha territóriu Timor Leste iha suku ida iha kada Munisipiu.
Tuir Diretora Mesmu ho orsamentu ne’ebe kiik ami kontrui ona uma hirak nee ho kualidade ne’ebé diak kompletu ho fasilidade lubuk ida, enkuantu kampara ho projetu baibain ho orasamentu provolta entre 20 ital mil ate 30 ital mil sei labele halo buat ida hanesan ami halo, maibe tanba ho sistema ne’ebé diak husi PNDS ami konsege halo ida nee atu bele fasilita diak liután atendementu polísia nia iha komunidade nia leet.
Embaisadora Nova Zelandia akompanha husi Komandante Geral PNTL koa pita simbolu inagura uma OPS
Entretantu Iha intervensaun embaisadora Nova Zelandia ba Timor Leste, Vicki Poole sente kontente tanba ho sistema ne’ebé PNDS uja bele konstrui uma ba polísia suku ho kualidade ne’ebé diak,no ida nee nudar pasu positivo hodi bele fasilita knar polisia suku. Iha lia fuan ikus husi reprejentante governo Nova Zelandia ba Timor Leste nee mak deklara prontidaun atu kontinua apoiu nafatin Polísia Nasionál Timor Leste iha futuru.
Nune’e mos Komandante Geral PNTL, Komisariu Julio da Costa Hornai iha nia intervensaun agradese ba governo Nova Zelandia tanba bele apoiu ona orsamentu hodi konstrui uma ba ofisiál polísia Suku hodi bele fasilita knar Polisia komunitariu iha suku laran. Nune’e Komandante Geral nee husu ba pesoál polísia suku ne’ebé sei uja uma nee atu kuidadu fasilidade ne’ebé iha tanba fasilidades hirak nee nudar patrimóniu estado ne’ebé sei uja atu fasilita knar polísia suku iha baze hodi ajuda komunidade hodi rejolve sira nia problema ne’ebé sira enfrenta.
