Diretora PNDS Nasional Dulce Guterres Junior, Aprezenta Kona-ba Mata Dalan (GUIA) Implementasaun Jéneru no Inkluzaun Sosial iha Siklu PNDS
Programa Nasionál Dezenvolvimentu Suku (PNDS) nudar Programa Governu, ne’ebe tau Jéneru no Inkluzaun Sosial (JIS) hanesan prinsípiu importante ida iha implementasaun Programa PNDS iha terrenu tanba atu garante partisipasaun ema hotu (Feto, Mane no Ema Defisiente) iha implementasaun PNDS ne’ebé tuir dezeñu PNDS nian, estipula ona iha manual implementasaun Programa PNDS nian, minimu 40% husi feto tengke partisipa iha Ekipa Jestaun Suku (EJS) no hetan benefísiu husi Programa PNDS ne’e rasik.
Partisipante sira Antusiasmu Tuir Workshop Kona-ba Mata Dalan (GUIA) Implementasaun Jéneru no Inkluzaun Sosial iha Siklu PNDS iha Salaun ETDA, Fatuhada, Dli.
Objetivu husi workshop kona-ba Mata Dalan (GUIA) Implementasaun Jéneru no Inkluzaun Sosial iha Siklu PNDS ne’e atu rona hamutuk no explora kle’an liu tan hanoin no esperensia ruma husi pontu fokal Jéneru no Inkluzaun Sosial, Ekipa Jestaun Suku feto no ema difisiente sira atu bele inklui iha Planu Asaun Annual Jéneru no Inkluzaun Sosial tinan 2018-2019 nian
Dulce Guterres, nudar Diretora Nasional Programa PNDS ne’ebé partisipa iha workshop ne’e hatete katak ida ne’e diak tebes ba maluk pontu fokal Jéneru no Inkluzaun Sosial, Ekipa Jestaun Suku feto no mane ho ema difisiente sira bele rona hamutuk no explora klean liu tan hanoin no informasaun husi istória diak para bele motiva maluk Pontu fokal jéneru no inkluzaun sosial, Ekipa Jestaun Suku feto no mane ho ema difisiente sira hodi hasa’e sira nia kapasidade no enkoraja sira involve an nafatin no partisipa barak liu tan iha prosesu tomak hodi bele hadi’a diak liu tan implementasaun Programa PNDS iha nivel aldeia no suku.
Partsisipante Sira Fahe Grupu Hodi Halo Diskusaun.
Iha workshop ne’e mos update servisu husi pontu fokal husi Munisípiu 12 no RAEOA kona-ba oportunidade ba pontu fokal Munisípiu ida-idak atu fahe sira nia esperensia oinsá sira nia atinjimentu, istória sussesu, dezafiu no oinsá sira ultrapasa dezafiu iha sira nia knar hanesan pontu fokal jéneru no inkluzaun sosial iha sira nia suku.
Partisipante husi workshop Mata Dalan (GUIA) implementasaun Jéneru no Inkluzaun Sosial iha Siklu PNDS ne’e hamutuk ema 50 ne’ebé kompostu husi Ekipa Jestaun Suku (EJS) ne’ebé mai husi Munisípiu 12 no RAEOA, ema ho Difisiente no Pontu fokal Sosial husi Munisípiu 12 no RAEOA.
