Chefe Departamento Monitorizasaun no Avaliasaun, Olderico Lopes, encera treinamentu Master Klase iha Centru Formasaun Tibar
Sekretariado Tekniku PNDS realiza treinamentu espesializada tékniku iha area sistema bomba bee mos, treinamentu nee nudar treinamentu hodi kompleta treinamentu master klase ba tékniku PNDS, liu-liu ba fasilitador tekniku atu nune’e fasilitador tékniku sira bele aprende diak liután oinsá instala kanalizasaun bee mos ba tangki rezervatoriu ne’ebé efisiente. Treinamentu nee rasik hala’o iha Centru Nasional Empregu e Formasaun Profesional ( CNEFP) Tibar.
Liu husi treinamentu nee fasilitador sira bele hatene prosesu atu instala no hadia problema ruma ne’ebé hasoru iha instalasaun inklui aprende instala sistema elektrisidade ne’ebé simples, seguru no efisiente. Treinamentu nee mos bele aumenta koinesimentu atu identifika material ne’ebé kualidade no oinsá halo plano bazea ba dezenhu ne’ebé iha.
Director Centru Formasaun Tibar halo intervensaun iha aktividade enceramentu
Chefe Departamentu Monitorizasaun no Avaliasaun PNDS, Olderico Lopes iha sesaun ensera treinamentu nee iha Tibar husu ba partisipante sira atu implementa matenek ne’ebé sira hetan hodi hadi’ak liután kualidade obra ba implementasaun programa PNDS liu-liu sistema bomba bee mos. Olderico Lopes dezafia formandus sira atu iha futuru sei la rona tan problema ruma kona-ba sistema bomba bee mos iha terreno.
Entertanto Diretor Centru Nasional Empregu e Formasaun Profesional (CNEFP) Tibar, Simaõ Barreto hateten Centru nafatin nakloke hodi kolabora ho programa PNDS inklui programa hotu ne’ebé iha hodi kapasita diak liután Timor oan hotu atu iha kapasidade hodi kompete iha Mercado trabalho iha Timor Leste. Treinamentu Master Klase ba sistema bomba bee mos nee partisipa husi partisipante ne’ebé mai husi Fasilitador Tekniku feto ho mane husi Postu Administrativo 12.
