Postu Saude Suku Fatumaqurek tuan husi Postu Administrativo Soibada, Munisipiu Manatutu ne’ebe pesoal saude uza hodi halo atendementu saude ba komunidade sira.
Komunidade Suku Fatumaquerec, Postu Administrativu Soibada, Munisipiu Manatuto. Ho total populasaun 500 husi uma kain 106, iha pasadu komunidade iha Suku ida ne’e ladun hetan atendementu saude ho diak tanba pesoál saude ne’ebé kolokadu iha suku ne’e hela iha suku Manufahi Ki’ik ho distánsia kilómetru 18 ba iha suku Fatumaquerec hodi halo atendementu.
Joao king Ling C. Yong nudar Chefe Suku Fatumaquerec informa katak iha pasadu komunidade iha suku ida ne’e ladun hetan atendementu saude ho dignu tanba kondisaun uma ne’ebé ladun di’ak no pesoál saude hela dok husi suku Fatumaquerec, ho implementasaun programa PNDS iha faze 1 siklu 2 hari’i ona uma residensia ba pesoál saude no agora dadun pesoál saude hela ona iha uma refere hodi halo atendementu suade ba komunidade sira.
Autoridade Lokal ne’e infoma mos katak uluk pesoál saude seidauk destaka mai iha suku, susar tebes inan isin rua sira atu bele hetan atendementu husi saude wainhira atu partus, situasaun ne’e rejulta ona inan isin rua balun mate tanba sentru saude dok.
Postu Saude foun iha suku Fatumaquerek, Soibada Munisipiu Manatutu
Chefe Suku ne’e espresa sentimentu katak hanesan reprezentante povu iha area remotas liu, sinti kontenti tebes ho implementasaun programa PNDS, tanba hatan duni ba povu nia preokupasaun no fo solusaun ba povu nia moris hodi harii Uma Pesoál Saude hodi dotor hela besik no hatan ba komunidade nia precisa.
Albertinho de Araujo, nudar pesoál saude ne’ebé hela iha Suku Manufahi no loron-loron tengki ba-mai Suku Manufahi Ki’ik-Fatumaquerec ho distánsia dok sente kontente tanba bele hela metin ona iha fatin hodi hala’o kna’ar atendementu saude ba komunidade sira
Ho implementasaun programa PNDS, Agora komunidade senti kontenti tanba bele perpara ona fatin ba pesoál saude hodi hela metin iha suku ne’e hodi fo asistensia saude ba sira, nune’e mehi komunidade nian atu hetan atendementu saude ho diak no dignu bele atinji.
