Kadeira neebe EJS Nahareca uja hodi fo aluga ba komunidade sira
Suku Nahareca Nudar Suku ne’ebé Partensi husi Postu Adiministrasaun Ossu, Municipio Viqueque. Suku ida ne’e aproveita tebes polítika Desenvolvimentu Komunitariu ne’ebé Governo implementa iha Teritoriu Timor Leste inklui mos suku refere, liu husi implementasaun programa PNDS komunidade aldeia Maka Bu’u, suku Nahareca konstrui ona uma rejidensia ba pesoál saude no centru komunitariu inklui sosa ona mobiliario hanesan kadeira plástiku hodi uza ba aktividade suku nian hanesan enkontru suku nian, fasilidade hirak nee alende uza ba enkontru suku autoridade suku no EJS deside hodi fo aluga ba komunidade ne’ebé presiza.
Tuir Chefe Ekipa Jestaun Suku (EJS), Suku Nahareca Grigorio da Silva afirma katak liu husi desizaun kolektivo ho komunidade sira, konkorda hodi fo aluga kadeira massa atu nuee’e iha futuru retornu neebe hetan husi aluga ne’e sei uza ba kustu operasaun no manutensaun uma pesoál saude iha suku refere ne’ebe hari’I ho orsamentu PNDS. Iha prinsipiu obra ne’ebe konstrui ho orsamentu PNDS, depois projetu finaliza no entrega ba komunidade suku no iha futuru governo sei la aloka tan fundus ba operasaun no manutensaun tanba ne’e maka liu husi desizaun kolektivu komunidade sira foti alternativu fo aluga kadeira hirak ne’e hanesan medidas hodi bele ajuda sira solusiona problema manutensaun no operasaun ba obra ne’ebé hari’I ona ho orsamentu PNDS iha futuru.
Uma Rezidensia ba pesoal saude iha suku Nahareca, Postu Ossu, Viqueque
Grigoria da Silva afirma husi kadeira ne’ebé sira fo aluga kolekta ona fundus $165 dolar Amerikano, no sei kontinua lao ho polítika ne’a atu bele hetan fundus ba manutensaun no operasaun obra PNDS nian inklui bele finansia mos atividade suku nian.
Obra rezidensia pesoál saude ne’ebé konstrui finaliza ona no sei inagura iha tempu badak hodi entrega ba komunidade sira, Ho nune’e Autoridade Suku Nahareca no EJS iha ona plano atu konvoka enkontru ho komunidade tomak hodi rekomenda transforma rezidensia pesoál saude ne’e sai hanesan uma bainaka ka alojamento suku, tanba pesoál saude ne’ebé destaka iha Suku ne’e ema rai nain no sei hela iha sira ida-idak nia uma hodi hala’o atendementu saude ba komunidade sira iha klínika.
Ho nune’e Lisaun diak ne’ebé foti husi suco Nahareca maka koperasaun servisu, rona no fiar malu entre konselho do suco ho nia komunidade tanba sira rasik hateten sussesu hirak ne’e la mai husi ema ka grupo ida deit maibé ne’e suco tomak nia vontade no serbisu hamutuk, ho motto katak hamutuk desenvolve Suku.
