Chefe Suku Hatulia, Ancelino Moises Pereira, Aprezenta Profile Suku Hatulia, Postu Administrativu Venilale, Munisipiu Baucau.
Programa suku vizita malu ba segundu iha tinan 2017 ne’e hanesan aktividade estudus komparativu ne’ebe hala’o iha suku Fatulia, Postu Administrativu Venilale, Munisipiu Baucau. aktividade ne’e inisiativa husi Sekretariadu Tekniku Programa Nasional Dezenvolvimentu Suku no apoiu husi parseirus CARDNO hodi fasilita Ekipa Jestaun Suku no Chefe Suku hodi fahe esperensia no istoria susesu ba malu kona-ba implementasaun Programa Nasional Dezenvolvimentu Suku iha sira ida-idak nia suku. Programa Suku Vijita malu ne’e hala’o loron ida iha Suku Fatulia, Postu Administrativu Venilale Munisipiu Baucau (25/05/2017).
Objetivu husi atividade ne’e mak fo oportunidade ba Ekipa Jestaun Suku ho komunidade sira hodi fahe esperensia ba malu kona-ba implementasaun programa dezenvolvimento ne’ebé la’o hela iha komunidade nia let, liu-liu oinsá atu halo jestaun Operasaun no Manutensaun ba Be’e Mos ne’ebé komunidade sira implementa liu husi Programa Nasional dezenvolvimentu Suku.
Leonel de Jesus Babo, hanesan Chefe suku Tocoluli, husi Postu Administrativo Railaco, fahe esperensia kona-ba dezenvolvimentu no jestaun bee mos iha ninia Suku.
Iha programa suku vizita malu ne’e hare liu ba sistema operasaun no manutensaun ba sistema Be’e Mos ho fo oportunidade ba suku sira seluk ne’ebe implmenta projetu Be’e Mos ho subsídiu Husi PNDS atu aprende husi suku sira seluk ne’ebé iha esperensia pozitivu kona-ba jestaun operasaun no manutensaun.
Ancelino Moises Pereira, hanesan Chefe Suku Fatulia, Postu Administrativu Venilale apresia tebes ho atividade ida ne’e tanba bele hasoru malu ho maluk sira husi Munisípiu seluk hodi fahe esperensia ba malu.
Iha parte seluk Chefe Suku Leonel de Jesus Babo, hanesan Chefe Tocoluli, husi Postu Administrativo Railaco, Munisipiu Ermera kontente tebes ho esperensia ne’ebé hato’o husi grupu maneija fasilidade Suku Fatulia ninia tanba sira iha esperensia ne’ebé hanesan no nia sujere katak orsamentu ida ne’ebé kontribui husi komunidade ne’e labele mate deit iha Banku, maibé bele forma grupu komparativu ruma iha komunidade atu nune’e sira bele fila liman hodi hetan rendimentu ruma no importante liu mak osan inan labele lakon.
Partisipante Husi Munisipiu 4 partisipa no antuasiasmu makas hodi rona aprezentasaun husi ekipa EJS suku Fatulia kona-ba Implementasaun Programa PNDS.
Liu husi programa suku vizita malu ida ne’e bele foti lisaun husi esperensia balu oinsá bele halo jestaun rasik, lisaun hirak ne’e bele sai hanesan referénsia ida ba ita sekretariadu PNDS, atu nune’e bele organiza workshop ida hodi tau hamutuk hanoin hirak ne’e atu uniforma liu-liu ba iha kna’ar ekipa operasaun no manutensaun ba ha Be’e Mos ninia hodi nune’e bele melhora liu tan funsaun ho efikás no efisien, maibe hirak ne’e tenke dezenvolve liu husi mata dalan ida atu nune’e bele standariza funsaun husi ekipa Operasaun no Manutensaun.
Partisipante sira husi programa suku vizita malu ida ne’e mais ou menus ema 60, kompostu husi Chefe Suku, Chefe Aldeia, fasilitador Finansas Postu Administartivu, Fasilitador tékniku Postu Administrativu, Reprezentante SAS husi Nasionál, Munisipiu ho Postu Administrativu, Ekipa Operasaun no Manutensaun, GMF husi Munisipiu 4 no inklui ekipa PNDS nomos Field Support Team husi ajénsia Cardno ne’ebe durante ne’e fo apoiu ba implementasaun Programa PNDS.
