Chefe Unidade Operasional PNDS Nasional, Rosito Guterres, Enzera Treinamento Fasilitador Sosial Posto Administrativu kona-ba Rezolusaun Konflitu iha salaun Ngo Ba Futuru, Comoro.
Iha loron 12 fulan Maio 2017, Sekretariadu Tekniku Programa Nasional Dezenvolvimento Suku liu husi Chefe Unidade Operasional PNDS, Entrega Sertifikadu ba Fasilitador Sosial Postu Administrativu (FSPA) ne’ebé remata ona treinamento kona-ba Rezolusaun Konflitu no Refresher, ne’ebe hala’o iha salaun Centro Ngo Ba Futuru Comoro, Dili.
Iha enseramentu ne’e Chefe Unidade Operasional Programa Nasional Dezenvolvimentu Suku, enkoraja ba Fasilitador Sosial Postu Administrativo sira atu servisu maka’as hodi nune’e bele asegura implementasaun programa PNDS. Tanba fasilitador sosial nia papel importante iha programa dezelvolvimentu komunitario hanesan PNDS.
Sr. Vidal Campus, hanesan reprezentante Diretor nomos treinadór husi Ngo Ba Futuru , hato’o hela lia menon ba partisipante sira molok fahe malu.
Treinamento ne’ebé imi hetan bele aumenta tan imi nia abilidade atu nune’e bele fasilita komunidade sira iha suku ho di’ak liu tan, Rosito Guterres, Chefe Unidade Operasional PNDS.
Objetivu husi treinamento ne’e atu hasa’e koñesimentu no kapasidade Fasilitador Sosial Postu Administrativo (FSPA) sira nian iha rezolusaun konflitu hodi bele apoiu Ekipa Jestaun Suku (EJS) ho diak bainhira mosu konflitu ka problema iha implementasaun programa PNDS.
Treinamenton ida ne’e hetan apresiasaun husi partispante sira, tanba bele dezenvolve tan kapasidade sira nian liu-liu iha area Sosial kona-ba Rezolusaun Konflitu no Refresher ba formatu sosial, atu nune’e sira bele fasilita komunidade sira hodi asegura implementasaun Programa PNDS iha suku hotu.
‘’ treinamento ne’e importante tebes tanba bele aumenta tan ami nia koñesimentu no bele ajuda ami, liu iha area sosial oinsá formula kona-ba rezolusaun konflitu wainhira hetan prolema iha treinu”, Alcino Freitas Lopes da Cruz, Fasilitador Sosial Posto Administrativu Maubara, Munisipiu Liquisa.
Chefe Unidade Operasional PNDS Nasional, Rosito Guterres, entrega Sertifikadu Treinamento ba partisipante sira.
Iha seremonia enseramentu ne’e partisipa mós reprezentante Diretur husi Ngo Ba Futuru Vidal Campus nomos hanesan treinadór husi Ngo Ba Futuru iha nia ninia intervensaun apresia tebes tanba treinamento ne’e partisipante sira antusiazu tebes atu aprende hodi bele amenta sira nia koñesimentu hodi nune’e bele aplika iha tereinu, jeralmente partisipante sira iha abilidade ne’ebe diak iha partisipasaun komunidade.
Treinamentu ne’e la’o durante semana tolu nia laran, total partisipante sira ne’ebé partisipa iha treinamentu ne’e hamutuk ema 77 ne’ebe fahe ba gropu 3, FSPA hirak ne’e mai husi Munisípiu 12 ho Região Administrativa Especial Oé-cusse Ambeno (RAEOA).
Treinamentu ida ne’e realiza ho susesu tanba hetan apoiu finanseiru husi Cardno nudar parseiru ne’ebé durante ne’e fo apoiu ba governu Timor Leste liu husi programa nasional dezenvolvimentu suku.
