Sekretariadu Tékniku PNDS Organiza Autoridade Komunitáriu Husi Munisípiu 4 Partisipa Iha Programa Suku Vizita Malu Iha Munisípiu Bobonaro

Chefe Suku Manapa, Simu ekipa husi Munisipiu 4 ho tradisional

Chefe Suku Manapa, Simu ekipa husi Munisipiu 4 ho tradisional.

Autoridade Komunitáriu husi Munisípiu Lautem, Baucau, Manatuto ho Liquiça partisipa iha programa Suku Vizita Malu iha Suku Manapa, Postu Administrativu Cailaco Munisípiu Bobonaro (02-04/05/2017). Objetivu prinsipál husi atividade ne’e mak oinsá Chefe Suku ho komunidade sira bele fahe esperensia ba malu kona-ba sustentabilidade programa dezenvolvimentu ne’ebé la’o hela iha komunidade let, liu-liu oinsá atu halo jestaun ba utilizasaun bee mos ne’ebé komunidade sira implementa tantu liu husi programa PNDS nomos husi ajénsia dezenvolvimentu sira seluk.

Iha programa suku vizita malu ne’e foka liu ba sistema operasaun no manutensaun ba bee mos, ho nia objetivu atu fo oportunidade ba suku sira ne’ebe implementa projetu Bee mos ho subsídiu PNDS atu aprende husi suku sira seluk ne’ebé iha esperensia pozitivu kona-ba jestaun operasaun no manutensaun.

Zeferino Loco Bere, hanesan Chefe Suku Manapa, Postu Administrativu Cailaco apresia tebes ho programa ida ne’e tanba bele hasoru malu ho maluk sira husi Munisípiu seluk hodi fahe esperensia ba malu.

Madalena Leto Soro, hanesan Tezoreiro EIP nomos GMF, fahe hela esperensia kona-ba Jestaun bee mos iha Suku Manapa

Madalena Leto Soro, hanesan Tezoreiro EIP nomos GMF, fahe hela esperensia kona-ba Jestaun bee mos iha Suku Manapa.

Programa bee mos tama iha Suku Manapa iha tinan 2012 liu husi ajénsia CVTL, durante atu besik tinan ida komunidade sira servisu hodi dada bee mos ida ne’e tama iha Suku, komunidade utiliza bee mos ida ne’e ate agora tanba iha kontribuisaun husi komunidade nomos jestaun ne’ebé di’ak husi grupu maneija fasilidade (GMF) sira hodi halo operasaun no manutensaun. Fulan ida komunidade kontribui $0.50 sentabus, no ate agora komunidade suku refere iha osan atu besik $3000,- hahú husi tinan 2012 to’o tinan 2017, osan ida ne’e sira tau iha Banku atu nune’e bele asegura hodi halo operasaun no manutensaun ba bee mos sira iha.

Julio Soares, hanesan Chefe Suku Caenlio, husi Postu Administrativo ,Iliomar, fahe esperensia kona-ba dezenvolvimentu no jestaun bee mos iha ninia Suku

Julio Soares, hanesan Chefe Suku Caenlio, husi Postu Administrativo, Iliomar, fahe esperensia kona-ba dezenvolvimentu no jestaun bee mos iha ninia Suku.

Iha parte seluk Chefe Suku Julio Soares, hanesan Chefe Suku Caenlio, husi Postu Administrativo Iliomar kontente tebes ho esperensia ne’ebé hato’o husi grupu maneija fasilidade Suku Manapa ninia tanba sira iha esperensia ne’ebé hanesan, no nia sujere katak orsamentu ida ne’ebé kontribui husi komunidade ne’e labele mate deit iha Banku, maibé bele forma grupu komparativu ruma iha komunidade atu nune’e sira bele fila liman hodi hetan rendimentu ruma no importante liu mak osan inan labele lakon.

Liu husi programa Suku Vizita malu ida ne’e ita bele foti lisaun husi GMF sira oinsá sira bele halo jestaun rasik, lisaun hirak ne’e bele sai hanesan referénsia ida ba ita Sekretariadu PNDS, atu nune’e bele organiza work shop ida hodi tau hamutuk hanoin hirak ne’e atu uniforma liu-liu ba iha kna’ar ekipa operasaun no manutensaun ba iha bee mos ninia hodi nune’e bele melhora liu tan funsaun ho efikás no efisien, maibé hirak ne’e tenke dezenvolve liu husi mata dalan ida atu nune’e bele standariza funsaun husi ekipa Operasaun no Manutensaun.

Partisipante sira husi programa suku vizita malu ida ne’e mais ou menus besik ema 30, kompostu husi Chefe Suku, Chefe Aldeia, Fasilitador Finansas Postu Adminitrativu, Fasilitador Tekniku Postu Administrativu, SAS husi Nasional, Munisipiu ho Postu Administrativu, Ekipa Operasaun no Manutensaun, GMF husi Munisípiu 4 no inklui ekipa PNDS nasional nomos FST sira.


Lian / Language