Hafoin kompleta Implementasaun Programa Nasional Dezenvolvimentu Suku (PNDS) ba siklu primeiru (Faze I, II, III), ekipa PNDS Munisípiu Ainaro, hala’o sorumutu avaliasaun annual ho nia objetivu atu hare susesu nomos dezafiu ne’ebé komunidade Munisípiu ne’e infrenta durante períodu implementasaun. Atividade avaliasaun ne’e hala’o iha Salaun Pensaun Nai-Dato Munisípiu Ainaro, (05/04/2017).
Administrador interinu, Fransisco Barros, halo intervensaun iha enkontru Avaliasaun Annual PNDS Munisipiu Ainaro.
Tuir reprejentante Administrador Interino Munisipiu Ainaro, Francisco Barros, hatete katak sorumutu ida ne’e importante tebes tanba bele sukat rezultadu implementasaun programa PNDS tinan tolu liu ba iha Munisípiu Ainaro, tantu ninia susesu nomos dezafiu ne’ebé hetan iha implementasaun. Iha parte seluk nia husu ba Chefe Suku foun neebe foin eleitu atu konsulta no kolabora hamutuk ho ekipa sira iha suku laran atu nune’e bele fo susesu ba dezenvolvimentu iha Suku, tantu liu husi programa PNDS nomos programa governo nian husi seitor seluk.
Iha parte seluk Diretór Delegasaun PNDS Munisípiu Ainaro, Filomeno Ceixas Pinto hatete avaliasaun annual nee halo hodi bele hare susesu no dezafiu ne’ebé ita hasoru durante implementasaun. Dezafiu ne’ebé ita hetan sai hanesan referénsia ida ba ita atu diskute no buka solusaun hamutuk iha avaliasaun ida ne’e atu nune’e iha implementasaun programa PNDS siklu tuir mai ita bele hadi’ak diak liu tan.
Partisipante Sira Husi Autoridade Lokal no EJS inklui Linha Sektoral Munisipiu Ainaro Partisipa iha Enkontru Avaliasaun Annual PNDS Munisipiu Ainaro.
Atividade ikus ba iha sorumutu avaliasaun annual ida ne’e mak fo premiu apresiasaun ba iha Suku melhor sira. Premiu ba suku manan nain sira mak mobiliáriu hanesan kadeira, Sertifikadu nomos taxa. Meus ida ne’e hanesan motivasaun ida ba suku sira seluk atu kompete liu tan iha implementasaun programa PNDS iha siklu tuir mai.
Suku melhor iha implementasaun programa PNDS Munisípiu Ainaro iha tinan 2016 mak hanesan Suku Mulo Posyto Administrativu Hatu-beliku, Suku Manutasi Posto Administrativu Ainaro, Suku Hora-Quik Posto Administrativu Maubessi
Total Partisipante husi avaliasaun annual PNDS mais ou menus ema 50 nolu resin, kompostu husi Reprerjentante Administradór Munisipál Ainaro,
Administradór Postu Administrativu, Chefe Suku no Konsellu Suku, Ekipa Jestaun Suku, Ekipa PNDS Nasional nomos Munisipál no inklui ekipa apoiu PNDS husi Cardno no linha sektorais.
