
Foto hamutuk ekipa vizita ho Presidente Autoridade Munisipal Bobonaro, iha Salaun Administrasaun Munisipal Bobonaro.
Programa Vizita Hamutuk ba Projetu Programa PNDS ne’e nia objetivu atu fo oportunidade ba iha Grupu Tékniku husi Seitor relevantes sira atu observa no halo komunikasaun direita ho komunidade Suku no aldeia oinsá komunidade bele rezolve rasik problema dezenvolvimentu ne’ebé sira infrenta durante ne’e, liu husi implementasaun Programa PNDS. Programa ne’e hala’o durante loron tolu iha Munisípiu Bobonaro (6-8/02/2017).
Antes ba vizita terrenu, ekipa ne’ebé lidera husi Chefe Unidade Operasional Programa PNDS Nasional, Rosito Guterres, ba dahuluk halo introdusaun objetivu no planu atividade ba iha autoridade Munisipál Bobonaro atu nune’e atividade ida ne’e bele la’o ho susesu. Julio Caeiro, Sekretáriu Munisipál Bobonaro hanesan reprezenta Prezidente Autoridade Munisipál simu ekipa ne’e ho kontente tebes tanba programa ida ne’e bele dezenvolve liña komunikasaun nomos kordenasaun servisu ne’ebé di’ak.
Iha vizita projetu programa PNDS, reprezentante husi liña ministeriais kontente ho implementasaun programa PNDS, tanba programa ida ne’e bele responde daudaun ona ejijénsia balun mai husi komunidade, liu-liu ba iha infraestrutura bázika ne’ebé komunidade infrenta durante ne’e, ezemplu hanesan kanál irigasaun ki’ik ba iha planta holtikultura la iha, sala eskola la to’o, fatin atendementu públiku hanesan tratamentu saudi ba iha komunidade la iha, estrada rurais liga ho estrada postu administrativu la di’ak nomos seitor relevantes sira seluk, maibé realidade difikuldades hirak ne’e komunidade konsege rezolve liu husi programa PNDS.
Vizita projetu programa PNDS, fahe iha ekipa rua, ekipa dahuluk vizita projetu iha Postu Administrativu Atabae ho Balibo no ekipa daruak destakadu ba iha Postu Administrativu Bobonaro ho Maliana.

Vizita Projetu kanal irigasaun ki’ik ba planta holtikultura iha Suku Sanirin, Postu Administrativu Balibo.
Projetu ne’ebé hetan vizita husi ekipa ne’e hamutuk 8, mak hanesan Rehabilitasaun Estrada Sirtu, iha Suku Aidabaleten, Postu Administrativu Atabae, Konstrusaun Irigasaun Ki’ik ba iha planta holtikultura, Rehabilitasaun Estrada Sirtu iha Suku Sanirin ho Konstrusaun Aumenta Sala Eskola 3, iha Suku Cowa, Postu Administrativu Balibo. Konstrusaun Postu Saudi, iha Suku Cota Bo’ot ho Konstrusaun Eskola Sala 3 iha Suku Lourba, Postu Administrativu Bobonaro, Konstrusaun Bee mos, iha Suku Odomau, Konstrusaun Drenajen iha Suku Holsa no Konstrusaun Valeta, Plat Deker no Ponte Ki’ik iha Suku Tapo Memo, Postu Administrativu Maliana.
Hafoin remata vizita iha terrenu, atividade ikus liu mak halo avaliasaun ba projetu hirak ne’ebé implementa liu husi programa PNDS iha rural. Iha avaliasaun ne’e Chefe seitores relevantes sira fo rekomendasaun aas liu iha parte oinsá atu asegura sustentabilidade nomos kualidade husi projetu ne’e rasik, no sira sujere atu kria kordenasaun ne’ebé forte antes defini prioridade final tantu iha nivel nasional, sub-nasional nomos iha postu administrativu, atu nune’e bele evita programa duplu nomos konstrusaun projetu hirak ne’ebé komunidade konstrui bele tuir padraun konstrusaun ne’ebé mak kada liña ministeriais sira defini ona. Rosito Guterres, ne’ebé lidera ekipa vizita ida ne’e apresia tebes ba sujestaun hirak ne’e atu nune’e iha futuru mai prosesu implementasaun programa PNDS bele hadi’ak liu tan.
Depois avaliasaun remata, atividade refere ofisiálmente taka husi Prezidente Autoridade Munisipál Bobonaro, Zeferino Soares dos Santos, iha intervensaun nia agradese ba ekipa tomak tanba atividade ida ne’e la’o ho susesu no nia sujere lisaun hirak ne’ebé hetan iha vizita ne’e, bele sai hanesan referénsia ida hodi hametin liu tan liña kordenasaun entre seitoral sira, tantu iha nivel nasional nomos iha Munisipál.
Ekipa vizita mais ou menus hamutuk ema nain ruanulu resin, kompostu husi reprezentante Ministériu Agrikultura, Obras Publika Transporte no Komunikasaun (Diresaun Nasional Ponte, Estrada no Kontrola de Cheias ho Diresaun Nasional Servisu Agua), Ministériu Edukasaun, Ministériu Saudi, Ekipa PNDS Nasional ho Munisípiu nomos Ekipa husi PNDS-SP.
- Konstrusan aumenta sala eskola 3, Suku Cowa Postu Administrativu Balibo
- Elio Lopes, representante husi Ministeriu Edukasaun, konverse hela ho profesor EBF Aldeia Lalis, Suku Cowa-Balibo
- Simao Laranjinha, husi Obras Publika, fo hela sujestaun ba ekipa PNDS kona-ba kriteriu loke estrada iha area rural
- Rui Pereira, hanesan to’os nain ba planta holtikultura iha Suku sanirin, hetan intervista husi ekipa TVTL
- Diretora PNDS, Dulce Guterres, fo ninia intervensaun iha enkontru avaliasaun ikus iha vizita seitoral iha Munisipiu Bobonaro
- Vizita Projetu kanal irigasaun ki’ik ba planta holtikultura iha Suku Sanirin, Postu Administrativu Balibo