Intervensaun Diretora PNDS, Dulce Guterres iha Forum Lideransa, iha JL Vila, Fatuhada Dili.
Enkontru forum Lideransa PNDS hanesan enkontru Jestor Nasional entre kargu (Chefia) iha sekretariado PNDS no Cardno hodi diskuti kle’an kona-ba dezafiu no susesu implementasaun iha tinan 2016. Enkontru nee hala’o iha JL Vila Fatuhada Dili, (13/01/2017)
Iha abertura enkontru nee Diretora PNDS, Dulce Guterres Junior hateten tinan 2016 hanesan tinan dezafiu ba programa PNDS no espera katak iha tinan 2017 governo bele iha hanoin atu halo mudansa hodi tau atensaun masimu ba orsamentu PNDS, mesmu iha alokasaun orsamentu Geral estado ba PNDS iha tinan 2017 ho montante nee kiik no bele kobre deit subsídiu operasional ba sukus ne’ebé implementa Faze 1,2 siklu primeiru no faze 3.
Tuir diretora tantu iha osan ka laiha osan laos sai hanesan dezafiu boot ba ita maibé PNDS sei iha serbisu barak ne’ebé sei lao hela hanesan Faze primeiru siklus segundu faze segundo siklu segundu, no faze terseiru ne’ebé sei lao hela iha finalizasaun projetos. Alende nee PNDS mos sei iha serbisu adisional barak mak hanesan Uma OPS ( Ofisial Policia Suku) kooperasaun entre PNTL ho Nova zelandia inklui Jardim, fatin halimar ba labarik infantil husi Ministériu da Educasaun.
Diskusaun Konaba Dezafiu no Susesu iha Implementasaun PNDS 2016.
Iha oportunidade nee Diretora Dulce Guterres mos sita kona-ba Dekretu lei foun PNDS nian atu muda ba institute públiku, la hanesan sekretariado signifika katak estrutura sei iha mudansa maibé programa sei la muda sei mantein ho polítika implementasaun ne’ebé iha.
Husi esbosu lei institutu públiku nee, sekretariado sei sai hanesan Diresaun Geral Ida ne’ebé lidera husi Diretur Geral ida no orgaun tolu iha estrutura ijemplu orgaun fiskal uniku hanesan board hodi tau matan ba programa hotu entermus finansas no aprovizionamentu, estrutura nee sei hetan nomeasaun husi Ministeriu da Administrasaun Estatal no Ministeriu das Finansas no mandatu ba estrutura Board nee dura ba tinan lima.
Alende fiskal uniku sei iha mos ekipa konselho koordenasaun ou grupo koordenasaun ne’ebé sei hala’o enkontru kada fulan tolu dala ida hodi halo enkontru ho sectoral sira sei lidera husi Direktur PNDS, enkontru Nivel Chefia PNDS nee diskute mos kona-ba susesu no dezafiu ne’ebé sai hanesan sasukat hodi formula plano asaun implementasaun ba tinan 2017 hodi hadi’a assunto ne’ebé sai hanesan dezafiu iha implementasaun 2016 nian.
