Duarte dos-Santos, hanesan representante ST-PNDS, esplika hela lalaok PNDS ba komunidade sira iha Suku Lalisuc, Pante Macassar-RAEOA
Iha Fulan Dezembru 2016 liu ba, NGO Lokál MDI (Organizasaun Naun Govermantal Mata Dalan Institut), organiza Diálogu komunitáriu kona-ba dezenvolvimentu komunitáriu, Dialogue ida ne’e nia objetivu mak atu fahe informasaun ba malu entre autoridade Munisipal, lider komunitáriu ho komunidade sira kona-ba polítika dezenvolvimentu ne’ebé estabelese iha Suku. Dialogue ida ne’e iha Suku Casabauc, Postu Administrativu Tilomar, Munisípiu Covalima ho Suku Lalisuc, Postu Administrativu Pante Macassar, RAEOA.
Delegasaun Sekretariadu Tékniku Programa Nasional Dezenvolvimentu Suku (ST-PNDS), Duarte dos Santos (Chefe Departamentu Komunikasaun), nu’udar reprezenta Diretora PNDS, iha aprezentasaun hatete katak PNDS la’os hanesan projetu, maibé hanesan programa ida ne’ebé atu aselera dezenvolvimentu hahú husi nivel baze, hodi nune’e ita nia komunidade bele sente dezenvolvimentu ne’e iha Suku nomos aldeia.
Carolino Marques, hanesan Kordenador Divijaun Haforsa Komunidade halo hela introdusaun kona-ba dialogu komunitariu iha Suku Casabauc-Tilomar.
Programa PNDS ne’ebé la’o iha Suku, la’os deit atu responde ba iha infraestrutura báziku ne’ebé komunidade sira infrenta, maibé fo kapasitasaun mos ba sira oinsá bele identifika rasik problema dezenvolvimentu ne’ebé sira infrenta, halo planu implementasaun, nomos jere programa ho susesu, alende ne’e komunidade hirak ne’ebé kontribui iha ekipa jestaun suku barak mak hetan fiar husi komunidade hodi eleitu no tu’ur iha konsellu suku hanesan Chefe Suku, Chefe Aldeia, tanba sira iha ona esperensia lubuk ida hodi halo dezenvolvimentu iha Suku.
Administradór Interinu Covalima, Afonso Nugueira Nahak, ne’ebé partisipa iha dialogue ne’e hatete katak eventu ne’e importante tebes tanba bele halo komunikasaun direita entre autoridade nasionál, Munisípiu ho komunidade atu nune’e komunidade bele hatene informasaun kona-ba polítika dezenvolvimentu komunitáriu ne’ebé agora la’o hela iha nasaun laran.
Programa PNDS foin implementa tinan tolu liu, komunidade sira sente kontente tanba governu hahú lori ona dezenvolvimentu hodi besik liu ba iha komunidade, tanba ne’e komunidade husu nafatin governu ninia komitmentu atu mantein programa ida ne’e tuir períodu ne’ebé governu defini ona.
-
- Duarte dos Santos, hanesan Chefe Dep. Komunikasaun PNDS, esplika hela lalaok PNDS ba Komunidade
-
- Felipe Cardoso, Diretor PNDS Mun. Covalima, fo ninia intervensaun kona-ba dialogu ida ne’e.
-
- Komunidade Suku Lalisuc, Pante Macassar, antusias tebes rona esplikasaun husi ekipa PNDS.
-
- Komunidade husu esplikasaun ba ekipa kona-ba PNDS
