Palestra husi Diretora PNDS, Dulce Guterres Junior iha Universidade da Paz, kona-ba Implementasaun programa PNDS hala’o iha Salaun Pos Graduasaun UNPAZ Dili (09/01/2016)
Diretora PNDS, Dulce Guterres Junior halao Palestra Salaun Pos Graduasaun UNPAZ, Dili konaba Implementasaun Programa PNDS iha Teritoriu Timor Leste.
Iha Palestra nee Diretora Dulce Guterres Junior, ba dala uluk Esplika kona-ba Tanba saida mak governo inisia programa PNDS, iha esplikasaun Diretora hateten Governo inisia programa PNDS tanba programa desenvolvimentu ne’ebé hahú hala’o iha Timor Leste too iha tinan 2011 laiha ekilibre atu komunidade sira bele hetan orsamentu ne’ebé governo aloka ba iha baze, ho nunee mak iha 2011, governo liu husi rezolusaun No 1/2011 hahú inisia programa ida nee atu suku hotu-hotu iha Timor laran tomak iha oportunidade hetan orsamentu ne’ebé governo aloka ba iha baze hodi bele responde difikuldades desenvolvimentu iha suku liu husi infraestrutura basiku hanesan bee mos, estrada rural, irigasaun kiik, no infraestrutura basiku seluk.
Diretora, Dulce Guterres esplika implementasaun programa PNDS hanesan programa ne’ebé ofrese oportunidade ba komunidade sira iha suku atu bele partisipa iha desenvolvimentu liu-liu iha infraestrutura basiku hodi bele hadi’a kondisaun moris komunidade nian, hodi nune’e komunidade bele asesu ba bee mos ne’ebé sira konstrui iha suku, asesu ba merkado hodi faan produtu lokal liu husi estrada rural ne’ebé sira konstrui, irigasaun kiik ne’ebé sira konstrui iha suku bele aumenta sira nia produsaun produtu lokal no seluk tan.
Diretora PNDS, Dulce Guterres Junior, halao aprezentasaun konaba lalaok implementasaun Programa PNDS
Alem de ne’e mos Diretora hateten modelu desenvolvimentu komunitariu hanesan PNDS alende bele halo redusaun pobreza no hamenus kiak komunidade sira iha area rural, governo nasionál bele halo mos komunikasaun direita ho komunidade sira. Hakbiit komunidade rural atu partisipa iha desenvolvimentu, hametin no fortifika linha koordenasaun entre governo nasionál ho governo lokal.
Iha sesaun husu no hatan partisipante sira apresia tebes ho implementasaun programa PNDS, tanba liu husi programa PNDS mak komunidade sira iha area rural bele hetan oportunidade hodi halo desevolvimentu infraestrutura basiku ne’ebé komunidade sira enfrenta durante tinan barak. Tuir observasaun partisipante sira, katak liu husi implementasaun programa PNDS kondisaun minimu ne’ebé komunidade sira enfrenta bele responde dadauk ona balun, espera katak ho implementasaun programa PNDS kondisaun minimu infraestrutura basiku ne’ebé komunidade sira enfrenta bele rejolvidu, no bele aumenta kapasidade komunidade nian antes tama ba polítika desentralizasaun..
