Funsionario sira partisipa iha enkontru kordenasaun
Atu kondena di’ak liután servisu iha baze kona-ba implementasaun programa PNDS, Sekretariadu Tékniku Programa Nasionál Dezenvolvimentu Suku (ST-PNDS) iha fulan-fulan sempre organiza enkontru kordenasaun iha nivel nasionál, enkontru kordenasaun ba fulan ida ne’e hala’o iha loron 24/06/2016.
Sra. Dulce Guterres Junior, nu’udar Diretora ba programa PNDS, iha ninia intervensaun apela ba funsionáriu PNDS tomak tantu iha nasionál nomós sub-nasionál atu haka’as an no mantein nafatin dixiplina, atu nune’e bele melhora liu tan servisu programa PNDS iha suku iha territóriu.
Enkontru ne’e hanesan atividade rutina iha kada fulan, iha enkontru ne’e diretór delegasaun Munisípiu inklui mós Chefe departamentu ida-idak aprezenta rezultadu progresu servisu ne’ebé mak atinji ona.
Sra. Jackie Pomeroy, Aprejenta hela Relatoriu Preliminary kona-ba Teknikal Audit fokus liu ba Infrastrutura basika
Bazeia ba aprezentasaun husi diretór delegasaun Munisípiu ida-idak, nota katak progresu implementasaun programa PNDS Faze III fizikamente atu atinji ona 100%, Faze II siklu 2 iha ona etapa prepara dezeñu BOQ no Faze I siklu 2 tama ona iha etapa mobilizasaun ba trabalhadores no hala’o treinamentu ba ekipa jestaun suku. Iha enkontru ne’e, alende apresentasaun kona-ba progresu implementasaun, aprezenta mos progresu husi ekipa téknikal Audit ne’ebe fokus liu ba infraestrutura bázika ne’ebé hala’o iha Munisípiu Viqueque, Covalima no Ermera.
Implementasaun programa PNDS hasoru difikuldade barak, maibé esforsu tomak ne’ebé funsionáriu PNDS iha difikuldade hirak nee konsege ultra pasa no agora hatudu progresu implementasaun lubuk ida ne’ebé fó ona benefísiu direita ba komunidade sira hodi asesu ba infraestrutura bázika, espera katak ho enkontru kordenasaun ne’ebé iha bele hametin kordenasaun no hadi’ak liu tan kualidade servisu iha terrenu.
Enkontru ne’e hetan partisipasaun husi funsionáriu PNDS tomak tantu nasionál, munisípiu no inklui mos Assessor Internasional, nasionál nomos Ekipa Suporta Terrenu (Field Support Team (FST)) husi ne’ebe durante ne’e fó apoiu ba implementasaun Programa PNDS.
