Programa Suku Vizita Malu ba Dala Ikus Iha Tinan Ida Ne’e Hala’o Iha Suku Sanirin, Munisipiu Bobonaro

Programa suku vizita malu ba dala ikus iha tinan 2016 ne’e hanesan aktividade estudus komparativu ne’ebe hala’o iha suku. aktividade ne’e nudar meus ida ne’beé Sekretariadu Tekniku Programa Nasional Dezenvolvimentu Suku apoiu husi parseirus hanesan CARDNO hodi fasilita Ekipa Jestaun Suku, entre suku ida ho suku hodi fahe esperensia no istoria susesu ba malu  kona-ba implementasaun Programa Nasional Dezenvolvimentu Suku. Programa Suku Vizita malu ne’e hala’o durante loron tolu hahú iha (7/06/2016).

Administrador Munisipiu Bobonaro Sr. Jeferino Soares do Santos enzera aktividade Suku Vizita Malu Iha Munisipiu Bobobaro

Molok ba terrenu, ekipa ida ne’e ba dahuluk hasoru malu ho autoridade munisípiu sira iha Administrasaun Munisípiu Bobonaro, ne’ebé reprezenta administradór Munisípiu Bobonaro, simu ekipa ne’e kontente tebes tamba hetan vizita husi autoridade lokál nomos lider komunitáriu mai husi Munisípiu seluk (Dili, Liquica no Regiaun Espesiál Oecusse).

Objektivu husi aktividade ne’e atu fo oportunidade ba Suco atu fahe esperensia no aprende hamutuk liu husi sira nian esperensia, Hametin relasaun no koordenasaun entre Suco no ho ajensia relevante seluk iha nivel Munisipiu no Posto Adminitrativu no espera katak Depois de programa ne’e partisipantes sira bele aprende lisaun no esperensia husi Suco uma nain, hodi sai hanesan referensia ba sira atu hadiak liu tan implementasaun programa PNDS iha sira nia Suku.

Administrador Postu Balibo Sr. Rojafiu Gonçalves halo Intervensaun iha Programa Suku Vizita Malu Iha Suku Sanirin

Suku ne’ebé sai tarjetu ba vizita ne’e mak suku Samirin, tamba iha implementasaun programa PNDS, komunidade iha suku ida ne’e hatudu duni sira nia partisipasaun aás tebes. Iha fahe esperensia ba malu, lider komunitária husi suku ida ne’e, Rojafiu Gonçalves, hatete katak: “ importante atu fo susesu ba programa sira iha suku mak komunikasaun entre lider komunitáriu komunidade tamba ho komunikasaun ne’ebé di’ak, bele enkoraja komunidade nia partisipasaun iha programa hotu ne’ebé tama mai iha suku.”

Hafoin remata vizita programa PNDS iha suku, iha oportunidade atu halo enkontru ikus ho autoridade lokál iha munisipiu Bobonaro, hodi halo avaliasaun ba aktividade ne’ebé remata ona.

Sr. Jeferino Soares dos Santos, nudar Administradór Munisipiu Bobonaro sente orgullu ho programa ne’e, tanba autoridade munisipiu sira bele fahe esperensia ba malu kona ba implementasaun programa PNDS.

“Sente kontente ho programa ne’e tamba liu husi programa suku vizita malu, autoridade Munisípiu ho lider komunitáriu nomos ekipa jestaun suku sira bele fahe ba malu kona-ba esperiensia no kordenasaun servisu hamutuk ne’ebe akontese iha munisípiu ida-idak, liu-liu iha implementasaun programa PNDS iha suku.” Jeferino dos Santos, Administrador Munisipiu Bobonaro.

Aktividade programa suku visita malu ne’ebé hala’o iha municipiu Bobonaro suku Sanirin ne’e hanesan aktividade ba dala ikus iha tinan 2016 ne’ebé partisipante mai husi Administrador Posto husi Municipiu 3 hanesan Dili, Liquisa no Regiaun Espesiál Oecusse, Chefe Suco, Presidente KPA, Chefe EIP, FSPA, FTPA, FST, Asesor, no komunidade suku Samirin. Aktividade prinsípal husi programa ne’e mak aprejentasaun husi presidente KPA suku Samirin kona-ba implementasaun Programa PNDS iha suku refere nomós halo vizita ba irigasaun be’e, no Centro Komunitaria iha suku Samirin.

Iha programa suku vizita malu ne’e Suku mak nudar alvo ba implementador programa, tanba ne’e mak autor sira iha suku persija fahe sira nian lisaun ba malu hodi nune’e bele implementa programa PNDS nian iha tinan tuir mai bele diak. Nomos iha suku vijita malu ne’e komunidade rekomenda ba oin suku vijita ba malu ne’e bele lao ba oin nafatin hodi nune’e komunidade bele aprende hamutuk lalaok programa PNDS iha ida-idak nian suku.

© Copyright 2016 Programa Nasional Dezenvolvimentu Suku