Diretora PNDS , Dulce Guterres Junior hamutuk ho Diretora INDIMO, Isabel Fernandes, husi Sefope halao abertura ba treinamentu Fasilitador Tekniku iha Centru Treinamentu Tibar
Planeamentu no jestaun obra ba projetu Sistema bee mos hodi instala Sistema bomba bee elétriku mak sai hanesan matéria prinsipal ba treinamentu fasilitadór tékniku postu Administrativu sira, iha centru treinamentu Tibar (23/05/2016).
Iha abertura ba treinamentu, Diretora INDIMO, Isabel Fernandes de Lima ne’ebé reprezenta Sekretáriu Estado SEFOPE, hatete iha nivel Edukasaun Fasilitador tékniku sira balun akaba sira nia estudu iha enjeñeiru, maibé treinamentu espesífiku hanesan nee importante ba sira atu bele kontinua kapasita no ajusta sira nia koñesimentu ho mudansa ne’ebé iha atu nune’e bele hala’o knar nudar funsionáriu públiku ho professional no kualidade.
Diretora PNDS, Dulce Guterres Junior iha nia intervensaun hatete depois de remata treinamentu Fasilitador sira tenke foti asaun hodi aplika matenek ne’ebé hetan, tanba nee tenke aproveita oportunidade ne’ebé iha hodi bele aumenta koñesimentu kona-ba oinsá halo planeamentu no jestaun ba implementasaun projetu iha terrenu.
Diretora PNDS ne’e orienta mos katak treinamentu movel hadulas (mobile training) iha nivel baze, Fasilitador tékniku sira presija akompaña hodi nune’e bele apár no melhora liu tan servisu iha terrenu.
Diretora PNDS, Dulce Guterres Junior halao nia intervensaun konaba treinamentu sistema planeamentu no gestaun obra iha Centru Treinamentu Tibar
Entretantu Diretór Nasionál Formasaun Professional husi SEFOPE, Iginio Ferreira hatete katak, nudar funsionáriu presija elava koñesimentu atu bele reforsa kna’ar ne’ebé funsionáriu sira simu hodi fo atendementu di’ak ba komunidade, atu nune’e nudar funsionáriu hatudu ninia profesionalismu serbisu ho kualidade.
Partisipante treinamentu nee hamutuk ema 35 resin, mai husi postu administrativu 65, maioria Fasilitador tékniku ne’ebé servisu iha postu administrativu. Treinamentu refere sei hala’o durante loron sanulu.
