Sra. Dulce Guterres Junior, Diretora PNDS, fo hela ninia intervensaun iha ekontru kordenasaun ho funsionariu PNDS
Atu kordena di’ak liután servisu iha baze, Sekretariadu Tékniku Programa Nasionál Dezenvolvimentu Suku (ST-PNDS) iha fulan-fulan sempre organiza enkontru kordenasaun iha nivel nasionál, enkontru kordenasaun ba fulan Abril ninia hala’o iha Etda Dili, iha loron 29 fulan Abril 2016.
Sra. Dulce Guterres Junior, nu’udar Kordenadór Jeral ba programa PNDS, iha ninia intervensaun apela ba funsionáriu PNDS tomak tantu iha nasionál nomós sub-nasionál hotu-hotu atu haka’as an no mantein nafatin dixiplina, atu nune’e bele melhora liu tan servisu programa PNDS iha suku territóriu laran tomak.
Enkontru ne’e hanesan atividade rutina ne’ebé akontese iha fulan-fulan, iha enkontru ne’e kada munisípiu inklui mós departamentu ida-idak aprezenta rezultadu progresu servisu nomós dezafiu ne’ebé ekipa hasoru iha terrenu atu nune’e bele buka solusaun hamutuk, alende aprezenta rezultadu servisu nomós dezafiu, ekipa ida-idak aprezenta mós planu servisu ne’ebé atu hala’o iha fulan tuir mai.
Ekipa Independen husi rai liur fo hela introdusaun kona-ba prosesu atu halo audit ba implementasaun programa PNDS
Implementasaun programa PNDS hasoru difikuldade barak, maibé rezultadu husi esforsu atu solusiona difikuldades hirak ne’e mak hatudu ona progresu lubuk ida ne’ebé fó ona benefísiu ba komunidade sira hodi asesu ba infraestrutura bázika, no espera katak ho enkontru mensal ne’ebé sempre hala’o fulan-fulan hodi informa kona-ba progresu no difikuldades ne’ebé enfrenta iha tereno, bele hamosu inisiativa ne’ebé diak ba solusiona difikuldades ne’ebé mosu iha implementasaun atu aslera prosesu dezenvolvimentu iha nivel baze.
Partisipante husi enkontru ne’e Kordenadór PNDS husi Munisípiu, Xefe Unidade, Xefe Departamentu, funsionáriu PNDS, nomós Assessor Internasional no nasionál, Ekipa Suporta Terrenu (Field Support Team (FST)) husi Ajensia Cardno ne’ebe durante ne’e fó apoiu ba implementasaun programa PNDS nomós ekipa Auditoria nebe’e independente mai ba komunidade projetus nomós auditaria fo impaktu ba infrastruktur ba iha ekonomia komunidade.
