Sua. Ex.cia Ministru Administrasaun Estatal, Sr. Deonisio Babo, fo hela ninia intervensaun iha enkontru Konsultivus nivel Diretor iha MAE
Lia fuan nee deklara husi Ministru Administrasaun Estatál, Deonisio Babo, bainhira lidera Enkontru konsultivu Diretores MAE hodi halo konsultasaun kona-ba programa Retornu Ekonómiku Báziku ne’ebé hanesan programa foun no tuir planu sei implementa husi Sekretariadu PNDS, liu husi pilotu ne’ebé sei hahú iha tinan 2017.
Enkontru konsultasaun nee hala’o iha salaun Enkontru Ministériu da Administrasaun Estatál no hola parte mos husi Diretores hotu iha Ministériu Administrasaun Estatál, (28/04/2016).
Iha enkontru, Dulce Guterres Junior, nudar Diretora PNDS ne’ebé apresentasaun kona-ba planu implementasaun programa Retornu Ekonómiku Báziku, ba dala uluk aprezenta progresu lala’ok implementasaun programa PNDS ne’ebé implementa ona iha territóriu Timor Leste. Objetivu husi apresentasaun nee mak atu bele fahe informasaun kle’an kona-ba implementasaun programa PNDS.
Diretora PNDS, Sra. Dulce Guterres Junior, Apresenta hela progresu jeral Programa PNDS iha eventu inkontru konsultivus nivel diretora iha MAE
Ministru Administrasaun Estatál, Deonisio Babo ne’ebé lidera enkontru nee iha nia intervensaun hatete Programa PNDS hanesan programa primadona tanba servisu ne’ebé Sekretariadu Programa Nasional Desenvolvimentu Suku hala’o ona durante nee hanesan susesu boot ne’ebé sira halo hodi deskonsentra no desentraliza dezenvolvimentu too iha baze.
Tuir Ministru Deonisio Babo, hahú husi Planeamentu, implementasaun, Fiskalizasaun no avaliasaun Sekretariodo PNDS konsege halo ho susesu, ida nee hanesan fator determinante ne’ebé Sekretariado halo hodi implementa ho diak programa nee.
Programa Retornu Ekonomiku Basiku hanesan programa foun ne’ebé sekretarido Nasional PNDS planea, espera katak husi ideias hotu ne’ebé akumula PNDS bele Implementa Programa Retorno Ekonomiku Basiku ho diak.
