Konstrusaun Bee Mos husi Komunidade liu husi programa PNDS, ofisialmente hetan inagura husi Vise Ministru da Administrasaun Estatal, Sr. Tomás do Rosário Cabral
Projetu infraestrutura báziku hamutuk 37 husi faze 1 ho Faze 2, implementa husi komunidade Munisípiu Manufahi liu husi Programa PNDS, Simbolikamente Inagura husi Vice Ministru da Administrasaun estatál, Sr. Tomás do Rosário Cabral, iha Suku Betano (30/09/2015).
Liu husi programa PNDS, Munisípiu Manufahi konstrui projetu infraestrutura báziku oi-oin mak hanesan rehabilitasaun Bee mós, konstrusaun Ponte ki’ik no plat deker, konstrusaun irigasaun ki’ik, rehabilitasaun no aumenta sala eskola, aumenta sala klínika, konstrusaun sentru komunitáriu multi funsaun inklui instalasaun saniamentu públiku.
Iha inagurasaun ne’e, Vice Ministru da Administrasaun Estatál, fó lia menon ba komunidade Suku Betano, atu tau atensaun masimu ba konstrusaun bee mós ne’ebé hari’i ona.
“Komunidade tenke iha inisiativa rasik atu halo manutensaun ba bee ida ne’e, atu nune’e bee mós ida ne’e bele utiliza ba iha tempu naruk nia laran”, Tomás do Rosário Cabral, Vise Ministru da Administrasaun Estatál.
Komunidade Suku Betano, simu Vise Ministru ho tradisional tebes
Iha oportunidade nee Xefe Suku Betano, Saturnino Tilman, hato’o agradese ba atensaun husi governu tanba bele responde ona komunidade nia ejijénsia liu-liu komunidade husi Aldeia Rai-Fusa ho Aldeia Leo-Ai, ne’ebé enfrenta problema bee mós desde tempu okupasaun.
Komunidade aldeia rua refere sente haksolok, tanba problema bee mós ne’ebé sira enfrenta iha tempu naruk liu ba, bele rezolve ona liu husi implementasaun programa PNDS.
“Antes ne’e ami tenke la’o ain ba kuru bee iha bee matan ida ne’e ho distánsia kilo metru ida resin, maibé agora bee monu ona iha ami nia uma oin, ami kontente tebes”, Marcos Pereira, Xefe Aldeia Rai-Fusa.
Orsamentu Infraestrutura ne’ebé aloka ba Postu Administrativu 3 (Same, Fatuberliu & Alas) ne’ebé implementa programa PNDS iha faze 1 ho faze 2 ho nia montante $826,000.00 (Faze 1 : Postu Administrativu Same $345,250.00 & Postu Administrativu Fatuberliu $247,250.00, Faze 2 : Postu Administrativu Alas=$233500.00).
Serimónia inaugurasaun ida ne’e hetan partisipasaun husi Autoridade lokál, hanesan Administradór Munisípiu, Administradór Postu Administrativu, Xefe Delegasaun Territorial husi Liñas Ministeriais, Lider Komunitáriu, Ekipa Jestaun Suku no komunidade.
-
- Kordenadora Jeral PNDS, Sra. Dulce Guterres Junior, esplika hela ba Vise Ministru kona ba partisipasaun komunidade hodi halo konstrusaun bee mos
-
- Komunidade sira rona hela mensajen husi Vise Ministru, oinsa atu tau matan ba bee mos ne’e hodi uja ba tempu naruk
-
- Komunidade sira antusias tebes hodi hein no simu Vise Ministru iha Suku Betano
-
- Vise Ministru hala’o hela dialogu ho komunidade, hafoin remata inaugurasaun bee mos
