Diretor Executivu FONGTIL halo hela introdusaun ba membru NGOs kona enkontru parseria ho governu
Enkontru Parseria entre Sosiedade Sivíl ho Governu ne’ebé organiza husi FONGTIL koalia kle’an liu kona-ba progresu implementasaun Programa PNDS, enkontru parseria nee hala’o iha salaun enkontru FONGTIL, Caicoli-Dili, (09/09/2015).
Diretór Ezekutivu FONGTIL, Sr. Arsenio Pereirra da Silva, iha nia intervensaun hatete enkontru nee importante tebes ba NGOs sira tantu NGOs lokál nomós NGOs Internasionais sira hodi bele apár no akompaña progresu implementasaun programa PNDS ne’ebé agora la’o hela, nune’e informasaun hirak ne’e bele ajuda NGOs sira atu halo atividade monitorizasaun.
Enkontru nee rasik partisipa direita husi Diretór Jeral Desentralizasaun Administrativa, Sr. Abilio Jose Caetano, nu’udar reprezentante Vise Ministru Administrasaun Estatál, iha ninia diskursu hatete katak programa PNDS hanesan programa ida ne’ebé konsentra liu ba iha infraestrutura bázika ne’ebé komunidade rasik mak identifika tuir sira ninia nesesidade, iha implementasaun programa ne’e komunidade rasik mak sai hanesan autór, tanba ne’e nia husu ba sosiedade sivíl sira, liu husi FONGTIL atu nafatin halo monitorizasaun nomós kontrolu sosiál atu nune’e bele asegura implementasaun programa PNDS di’ak liu tan.
Kordenadora Jeral PNDS halo intervensaun ba preokupasaun mai husi membru NGOs kona ba implementasaun programa PNDS
Iha parte seluk, Kordenadóra Jeral PNDS, Sra. Dulce Guterres Junior, hatán ba preokupasaun husi sosiedade sivíl sira kona ba konteúdu lolos husi hasa’e kondisaun Sósiu ekonómiku komunidade ninia, pelumenus ho rezultadu infraestrutura bázika ne’ebé komunidade konstrui liu husi implementasaun programa PNDS, hanesan konstrusaun irigasaun ki’ik, rehabilitasaun estrada rurais, instalasaun bee mós no seluk tan, hirak ne’e bele fó ona espasu ba komunidade sira oinsá atu dezenvolve sira nia ekonomia uma laran, ezemplu konkretu mak hanesan komunidade ninia kintál atu kuda modo, ai-manas, tomate no seluk tan la presija hein udan tun, maibé bailoro mós sira bele halo atividade hirak ne’e tanba asesu ona bee husi irigasaun ki’ik ou bee restu husi bee mós ne’ebé sira utiliza loro-loron, alende ne’e produtu lokál hirak ne’e bele asesu mós to’o iha merkadu lokál, kondisaun hirak ne’e refleta tebes ba komunidade nia moris loro-loron.
Mudansa hirak ne’e ita nia komunidade sira sei hetan enkuantu komunidade rasik iha konxiénsia atu asegura didi’ak rezultadu husi implementasaun programa ne’ebé sira hetan no utiliza tuir duni sira nia nesesidade.
Total partisipante hirak ne’ebé partisipa iha sorumutu ne’e hamutuk ema nain 60 resin, kompostu husi membru FONGTIL ne’ebé mak hala’o nia programa iha Timor laran tomak.
-
- Diretor Jeral Desentralizasaun Administrativa husi MAE fo hela lia menon ba NGOs atu mantein nafatin kontrulu sosial hodi asegura implementasaun programa PNDS
-
- Partisipantes sira rona hela apresentasaun progresu programa PNDS husi ekipa tekniku
-
- Sabina Fernandes Seac, Diretor NGO SHC halo intervensaun ba apresentasaun ne’ebe hato’o husi ekipa tekniku PNDS
-
- Kordenadora Jeral PNDS halo intervensaun ba preokupasaun mai husi membru NGOs kona ba implementasaun programa PNDS
-
- Kordenadora Jeral PNDS halo intervensaun ba preokupasaun mai husi membru NGOs kona ba implementasaun programa PNDS
-
- NGOs lokal sira apresia ho mekanizmu implementasaun programa, hafoin rona apresentasaun husi ekipa tekniku PNDS
