Komunidade Suku Usi Taqueno Realiza Enkontru Akontabilidade Final ba Implementasaun PNDS

Komunidade suku Usi Taqueno partisipa iha enkontru akontabilidade final

Komunidade suku Usi Taqueno partisipa iha enkontru akontabilidade final

Atu garantia transparansia no akontabilidade husi ezekusaun orsamentu ba implementasaun programa PNDS, Komunidade suku Usi Taqueno, Postu Administrativu Oesilo, Rejiaun Espesiál Oe-cusse partisipa iha enkontru akontabilidade final iha loron 15 fulan Julho 2015. Enkontru akontabilidade ne’e ninia objetivu atu informa ba komunidade suku liu-liu kona ba gastus orsamentu nomós rezultadu projetu ne’ebé komunidade sira finaliza ona.

Alokasaun subsídiu PNDS ba iha Suku Usi Taqueno ho montante US$50,000.00, orsamentu ida ne’e inklui subsídiu rua mak hanesan : US$6,000.00 ba subsídiu operasional no US$44,000.00 ba subsídiu infraestrutura. Enkontru akontabilidade iha suku ne’e refere liu ba ezekusaun orsamentu ba iha item hirak ne’ebé mensiona.

Ekipa Implementasaun Programa (EIP) hanesan órgaun importante ne’ebé jere orsamentu suku, hato’o akontabilidade ba komunidade iha enkontru ne’e.

Xefe, Sekretariu ho Tezureiru Ekipa Implementasaun Programa (EIP) konta hela osan restu iha komunidade nia oin iha enkontru akontabilidade

Xefe, Sekretariu ho Tezureiru Ekipa Implementasaun Programa (EIP) konta hela osan restu iha komunidade nia oin iha enkontru akontabilidade

Helena Caet, hanesan Tezureiru EIP, iha enkontru ne’e informa ba komunidade katak orsamentu operasional ho montante US$6,000.00 ne’e ezekuta ona US$5,251.90 no sei hela restu US$748.10, orsamentu ne’e aloka ba iha atividade ne’ebé akontese iha suku liu-liu ba servisu administrasaun Ekipa Jestaun Suku (EJS) ninia hanesan selu insentivu, sosa ATK, organiza treinamentu ho enkontru iha suku nomós atividade relevantes ne’ebé akontese iha Suku ho aldeia.

Nia haktuir mós katak orsamentu infraestrutura ho montante US$44,000.00 ezekuta US$43,434.00 ba projetu rehabilitasaun estrada iha aldeia Nibin liga ho estrada nasionál ho nia distánsia kuaze kilómetru 3, orsamentu ne’e aloka ba iha sosa material konstrusaun inklui kustu ba transporte, selu trabalhadores nomós ezekuta ba atividade relevantes sira seluk, osan restu infraestrutura ne’ebé sei iha hamutuk US$566,00.

Total orsamentu restu husi item rua ne’e hamutuk US$1324.10 (osan restu subsídiu operasional=US$748.10 + osan restu subsídiu infraestrutura =US$566.00), osan hirak ne’e hatama fila fali ba konta bankária Suku tuir ninia item ida-idak.

Iha enkontru akontabilidade final ne’e mais ou menus ema nain 80 resin mak partisipa, alende komunidade, partisipa mós autoridade lokál, lider komunitáriu ho konsellu suku, polísia komunitáriu no inklui reprezentante husi NGO Luta Hamutuk hodi halo monitorizasaun.