Dulce Guterres Junior, nu’udar kordenadora Jeral PNDS, fo nia intervensaun iha enkontru kordenasaun PNDS
Atu kordena di’ak liután servisu iha baze, Sekretariadu Tékniku Programa Nasionál Dezenvolvimentu Suku (ST-PNDS) iha fulan-fulan sempre organiza enkontru kordenasaun iha nivel nasionál, enkontru kordenasaun ba fulan Julho ninia hala’o iha Dili, iha loron 31 fulan Julho 2015.
Sra. Dulce Guterres Junior, nu’udar Kordenadór Jeral ba programa PNDS, iha ninia intervensaun apela ba funsionáriu PNDS tomak tantu iha nasionál nomós sub-nasionál hotu-hotu atu haka’as an no mantein nafatin dixiplina, atu nune’e bele melhora liu tan servisu programa PNDS iha suku iha territóriu.
Enkontru ne’e hanesan atividade rutina ne’ebé akontese iha fulan-fulan, iha enkontru ne’e kada munisípiu inklui mós departamentu ida-idak aprezenta rezultadu progresu servisu nomós dezafiu ne’ebé ekipa hasoru iha terrenu atu nune’e bele buka solusaun hamutuk, alende aprezenta rezultadu servisu nomós dezafiu, ekipa ida idak aprezenta mós planu servisu ne’ebé atu hala’o iha fulan tuir mai.
Implementasaun programa PNDS hasoru difikuldade barak, maibé rezultadu husi esforsu atu solusiona difikuldades hirak nee mak hatudu ona progresu lubuk ida ne’ebé fó ona benefísiu ba komunidade sira hodi asesu ba infraestrutura bázika, no espera katak ho enkontru mensal ne’ebé sempre hala’o fulan-fulan hodi informa kona-ba progresu no difikuldades ne’ebé enfrenta iha tereno, bele hamosu inisiativa ne’ebé diak ba solusiona difikuldades ne’ebé mosu iha implementasaun atu aslera prosesu dezenvolvimentu iha nivel baze.
-
- Funsionariu PNDS sira aponta hela pontus-pontus importante iha enkontru kordenasaun PNDS
-
- Partisipantes enkontru kordenasaun rona hela apresentasaun husi ekipa komunikasaun PNDS
-
- Funsionariu PNDS nasional ho sub-nasional rona hela intervensaun husi kordenadora jeral PNDS
-
- Funsionariu PNDS nasional ho sub-nasional partisipa iha enkontru kordenasaun nasional
