Komunidade Sira partisipa iha enkontru aprovisionamentu
Implementasaun Programa Nasionál Dezenvolvimentu Suku (PNDS), iha suku 202 iha faze III nian hahú hala’o ona prosesu aprovizionamentu no mobilizasaun trabalhadores, Enkontru aprovizionamentu no mobilizasaun trabalhadores nudar atividades ba dahuluk antes hahú konstrusaun.
Objetivu fundamental husi enkontru aprovizionamentu ida nee mak oinsá bele orienta komunidade sira utiliza fundus PNDS tuir prinsípiu husi mata dalan aprovizionamentu no regras finanseiru ninia, atu nune’e bele garantia transparansia no akontabilidade.
Espesifikamente iha prosesu aprovizionamentu ida ne’e nakloke ba komunidade tomak liu-liu komunidade sira iha Suku.
Iha prosesu aprovizionamentu Ekipa implementasaun Programa (EIP) sei halo planu hodi defini métodu aprovizionamentu tuir Manual Implementasaun Projetu no Manual Operasaun Finansas PNDS nian.
Komunidade sira observa hela pedidu kuotasaun husi kompañia lokál ne’ebe konkore
Bain hira finaliza BoQ no asina ona akordu ba implementasaun projetu, signifika katak halo ona pedidu ba transferensia fundus Suku ninia, karik fundus tama ona iha konta bankária Suku, EIP sei halo analiza ba fundus hirak ne’e, no hahú distribui pedidu kuotasaun ba fornesedor sira hodi hein durante semana ida, hafoin ida ne’e EIP sei akompaña husi Fasilitador Finansas Postu Administrativu sei halo enkontru iha nivel Suku hamutuk ho komunidade (KPA no nia membru tomak) hodi loke no avalia ba pedidu kuotasaun hirak ne’e, atu nune’e bele deside hamutuk kompañia lokál ida ne’ebé mak atu sai hanesan manán na’in hodi sai hanesan fornesedor ba materiais konstrusaun tomak programa ninia ba iha Suku.
Fasilitador Sosial, halo introdusaun kona-ba atividade ne’ebe la’o iha Suku
Mobilizasaun trabalhadores ba projetu programa PNDS maioria mai husi komunidade lokál ou komunidade Suku no aldeia, trabalhadores sira serbisu hanesan individual, dala ruma mós bele serbisu iha grupu nia laran tuir oráriu ne’ebé iha, pagamentu sei bazeia ba kada serbisu ne’ebe maka ramata.
Tuir planu hafoin finaliza prosesu aprovizionamentu no mobilizasaun trabalhadores, Suku 202 hahú ona konstrusaun iha inisiu fulan Agusto, depoizde fundos infrastrutura ba projetus prioridades tama ona ba iha konta bankaria suku.
