Prezidente da Republik akompana husi Sekretariu Estadu Administrasaun Estatal ofisialmente Inagura Ponte iha Aldeia Bee Ali, Hatolia
Ponte Be’eali Ne’ebé lokaliza iha Suku Hatolia, Pontu Administrativu Hatolia, Munisípiu Ermera ofisiálmente inagura husi Prezidente da Repúblika, Taur Matan Ruak (28/05/2015). Ponte ida ne’e komunidade konstrui ho orsamentu husi governu ne’ebé aloka liu husi programa PNDS ba iha Suku.
Iha inagurasaun ne’e, Prezidente Taur Matan Ruak, loúba ho komunidade sira nia partisipasaun iha programa PNDS tanba ho subsídiu ne’ebé ki’ik komunidade bele halo buat ne’ebé bele benefisia ema barak.
“Imi hatudu duni imi nian vontade atu dezenvolve imi nian suku, imi iha espíritu hakarak dezenvolve imi nia suku, tanba ho orsamentu oituan, imi bele konstrui obra ida ne’ebé boot hanesan ne’e”, hato’o husi Prezidente da Repúblika, Taur Matan Ruak.
Tuir Prezidente serbisu ne’ebé komunidade husi Suku ida nee hala’o sai hanesan ezemplu ba Suku hotu iha Timor Laran, tanba ho dezenvolvimentu hahú husi nivel baze ita bele alkansa dezenvolvimentu nasionál ba iha futuru ne’ebé di’ak liu, ida ne’e mak konseitu lolos dezenvolvimentu ba nasaun ida ninia.
Carlos Martins, hanesan komunidade husi Suku Hatolia, kontente tebes ho prezensa Prezidente Taur Matan Ruak, hodi inagura konstrusaun ponte ne’ebé halo husi komunidade rasik liu husi programa PNDS, no nia rasik mos kontente ho rezultadu servisu ida ne’e.
Ponte foun Bee-Ali hetan bensaun husi Amo Paroqu Hatolia
“Ami sente kontente tebes, tanba ponte nee bele fasilita ona ami nia atividade tomak, iha pasadu, kuandu tempu udan susar tebes ba ami atu bele asesu ho transporte liu husi fatin ida nee tanba ponte ne’e tau deit ho Ai kabelak, maibé ho orsamentu ne’ebe governu finansia liu husi programa PNDS ami bele konstrui ponte ida nee”. Carlos Martins, Komunidade husi Suku Hatolia-Vila.
Konstrusaun ponte ida ne’e ho nia medida 14 m x 6 m ho nia altura mais ou menus 12 metrus. Orsamentu ne’ebé aloka ba iha konstrusaun ida ne’e ho nia montante $39,000.00. Komunidade suku 3 mak hetan benefisiáriu husi ponte ida ne’e mak hanesan Suku Leimea Sorin Balu, Leimea Kraik no inklui mós postu Administrativu Letefoho.
Suku Hatolia implementa programa PNDS iha faze I iha fulan Setembru 2013 liu ba. Total subsídiu suku ne’ebé aloka ba iha suku ida ne’e ho nia montante $55,000.00, orsamentu ida ne’e inklui subsídiu rua mak hanesan $6,250.00 ba operasional no $48,750.00 ba infraestrutura$48,000.00.
