Primeiru Ministru, Rui Maria de A. ho Vise Ambassador Australia, Sra. Angela Robinson ofisialmente inagura Irigasaun Ki’ik iha Wemaresi-Becoan-Sanirin
Primeiru Ministru, Dr. Rui Maria de Araújo, simbolikamente inagura projetu programa PNDS 28 iha Suku Batugade Vila, Postu Administrativu Balibo, Munisípiu Bobonaro (19/05/2015).
Antes halo inagurasaun, Primeiru Ministru disloka uluk ba Wemaresi-Becoan, Suku Sanirin, Postu Administrativu Balibo, hodi hare besik liu tan konstrusaun irigasaun ki’ik ne’ebé implementa direita husi komunidade sira liu husi programa PNDS.
Komunidade sira kontente tebes ho programa PNDS tanba fó duni benefísiu direitamente ba sira.
“Uluk ami halo kantadeiru hodi kuda modo hanesan fore tali,
Primeru Ministru pasa revista ba konstrusaun ne’ebe hala’o husi komunidade irigasaun
Baria, tomate no modo sira seluk iha tempu udan, maibé agora ami la hein udan ben tanba iha ona irigasaun ida ne’e bele fornese bee ba ami nia kintál hodi utiliza ba kuda modo”, hato’o husi Virgilio Pereira, komunidade Suku Sanirin.
Iha inagurasaun ne’e Primeiru Ministru fó lia menon ba komunidade sira atu utiliza didi’ak liu-liu infraestrutura ne’ebé dezenvolve liu husi programa PNDS iha Suku hanesan konstrusaun sentru komunitáriu multi funsaun, rehabilitasaun eskola, rehabilitasaun estrada ho ponte ki’ik, irigasaun, nomós konstrusaun bee mós.
“Apoiu ne’ebé estadu fó liu husi programa PNDS ba Suku, Postu Administrativu nomós Munisípiu, labele hela hanesan ne’e deit, maibé utiliza ho kuidadu ba atividade hotu ne’ebé atu dezenvolve imi nia Suku”, hato’o husi Primeiru Ministru, Dr. Rui Maria de Araújo.
Depois ramata inagurasaun, Primeiru Ministru kontinua ba hare konstrusaun bee mós ne’ebé implementa iha Aldeia Lotan, Suku Batugade. Komunidade aldeia ida ne’e kontente tebes ho programa PNDS tanba bele rezolve sira nia problema bee mós ne’ebé sira enfrenta durante tempu naruk nia laran.
Primeru Ministru, Rui Maria de A. hare imajen projetu Programa PNDS ne’ebe finaliza ona husi komunidade
Iha inagurasaun projetu programa PNDS ne’e partisipa mós Sra. Angela Robinson, Vise Embaixadór Governu Australia ba Timor Leste, iha ninia diskursu hatete katak prezensa iha inagurasaun projetu programa PNDS ida ne’e hanesan onra bot ida atu hare ho matan governu ho komunidade nia susesu iha programa PNDS, tanba programa PNDS hanesan programa dezenvolvimentu bazeia ba komunidade nia inisiativa, hakbi’it komunidade atu servisu hamutuk lidera no jere rasik projetu programa PNDS.
“Ami nia servisu mak servisu hamutuk ho Governu Timor Leste atu halo PNDS sai programa Dezenvolvimentu Komunitáriu ne’ebé di’ak liu iha mundu”, Angela Robinson, Vise Embaixadór Australia ba Timor Leste.
Postu Administrativu Balibo ho Cailaco implementa programa PNDS iha faze I iha fulan Setembru 2013. Postu Administrativu Balibo iha Suku 6 ho total projetu hamutuk iha 12, postu Administrativu Cailaco iha Suku 8 ho total projetu 16 projetu hirak ne’e oras finaliza no ofisiálmente inagura husi Primeiru Ministru, Dr. Rui Maria de Araujo.
