Prezidente Autoridade RAEOA e ZEESM Asina Plaka Inagurasaun Projetu Programa PNDS
Prezidente Autoridade Região Administrativa Especial Oé-cusse Ambeno (RAEOA) e Zonas Especiais de Economia Social de Mercado (ZEESM) simbolikamente inagura projetu programa PNDS 19 iha Postu Administrativu Pante-Macassar-Oe-cusse (23 Abril 2015)
Iha Oe-cusse, Prezidente Autoridade RAEOA e ZEESM, Dr. Mari Alkatiri, disloka ba Suku Bobocasse hodi inagura adisional sala rua ba eskola Primaria Fatu-Bijae, simbolikamente reprezenta projetu programa PNDS sira seluk ne’ebé implementa iha Pantemacasar-Oecusse.
Iha inagurasaun ne’e Prezidente Autoridade apresia tebes programa Governu ida ne’e tanba iha implementasaun programa ida ne’e jere rasik husi komunidade Suku no Aldeia.
“Uluk hau rona deit, agora hau iha oportunidade atu hare ho matan, no hatudu katak komunidade bele halo rasik, ne’e importante”, hato’o husi Dr. Mari Alkatiri, Prezidente Autoridade RAEO e ZEESM.
Profesór sira sente kontente tanba ho projetu husi programa PNDS fó duni benefísiu ba sira.
Projetu Programa PNDS Aumenta Sala Foun rua eskola iha Aldeia Fatu-Bijae, Suku Bobocasse-Pantemacasar/Oecusse
“Uluk iha 2004 ami uja deit uma tali, iha 2008 ami hari Sala 3, foin dau-daun 2014 ho programa PNDS ami aumenta tan sala rua, ida ne’e ami sente kontente, tanba bele akumula ona total eskola oan hamutuk 194”, hato’o husi Marcus Nufa, Kordenadór Eskola.
Bainhira viajen ba suku Bobocasse, Prezidente Região Administrativa Especial Oé-cusse-Ambeno, ho nia komitiva, hare mós konstrusaun estrada, ponte no tanke bee mós ne’ebé komunidade implementa liu husi programa PNDS.
Iha inagurasaun projetu programa PNDS ne’e partisipa mos Sra. Ms Neryl Lewis, hanesan Counsellor for Rural Development, husi Governu Australia.
-
- Presidente Autoridade ho nia komitiva simu husi komunidade Suku ho lisan tradisional
-
- Komunidade sira simu Presidente Autoridade RAEOA eZEESM ho nia komitiva ho tara tais
-
- Presidente Autoridade RAEOA e ZEESM halo inspesaun ba konstrusaun ne’ebe halo rasik husi komunidade
-
- Presidente Autoridade RAEOA e ZEESM intrega ofisial Xave eskola ba kordenador eskola, Marcus Nufa
-
- Komunidade Suku intrega relatorio servisu programa PNDS ba Presidente Autoridade RAEOA e ZEESM
-
- Eskola oan sira haksolok hodi simu Presidente Autoridade RAEOA eZEESM ho nia komitiva
