Suku Hatolia implementa PNDS iha Faze I, bainhira programa ida ne’e hahú tama iha Suku Hatolia, komunidade
Ponte ida ne’e fasilita mos estudante ba-mai iha tempu udan hanesan ne’e.
sira organiza an no halibur hamutuk hodi identifika difikuldade dezenvolvimentu sá ida mak sira enfrenta atu nune’e bele resolve liu husi programa PNDS, no ikus mai sira konkorda hamutuk katak konstrusaun ponte iha Be’eali mak sai hanesan prioridade as liu iha Suku ida ne’e.
Anastasio Lemos Soares, hanesan komunidade, hatete katak :
“Konstrusaun ponte ida ne’e sai hanesan prioridade as liu iha Suku Hatolia, tanba bele fasilita sirkulasaun komunidade sira ba halo negósiu iha merkadu”.
Funsaun husi ponte ida ne’e laos deit atu fasilita transporte públiku, maibé fasilita mós estudante sira ba eskola iha Hatolia Vila. “Ponte ida ne’e fasilita mós estudante sira ba eskola, tanba iha tempu udan hanesan ne’e fatin ida ne’e mota bot tebes los”, hato’o husi Anastasio Lemos Soares.
Iha implementasaun, komunidade Suku Hatolia orgullu tebes ho programa PNDS no sira hatudu duni sira nia partisipasaun ne’ebé involve ema hotu tantu ferik-katuas, juventude feto-mane inklui mós ita nia maluk sira ho defisiente liu-liu iha parte servisu ba konstrusaun ponte ne’ebé sira defini sai hanesan prioridade.
“Hanesan ema ho defisiente, ha’u nia papél iha konstrusaun ne’e mak ajuda lalin sasán ba badain sira tuir forsa ne’ebé iha”, Filomino Salsinha, hanesan juventude.
Konstrusaun ponte implementa liu husi servisu komunitaria
Martinha de Castro, hanesan juventude feto husi Suku ida ne’e hatete katak : “Hau kontente ho programa PNDS, tanba programa ida mai atu halo dezenvolvimentu iha ami nia Suku, no ami prontu fó ami nia kontribuisaun ba servisu hanesan lalin fatuk nomós material konstrusaun ba ema servisu”.
Durante servisu ba konstrusaun ponte, grupu servisu ne’ebé forma husi Ekipa Implementasaun Programa (EIP) halo servisu rotativu ne’ebé involve komunidade mai husi aldeia 4 mak hanesan Hatu Batu, Aimeraulo, Hohopu no Simhei. Kada Grupu servisu ne’e involve ema na’in 7 no servisu durante semana ida, depois grupu ida ne’e kompleita servisu iha semana ida, troka fali ho grupu no ema husi aldeia seluk, i kontinua halo rotasaun to’o konstrusaun ne’e finaliza.
Orsamentu ba konstrusaun ponte ida ne’e nia montante $38,572,- no komunidade ne’ebé hetan benefísiu husi konstrusaun ponte ida ne’e laos deit komunidade husi Suku Hatolia deit maibé Suku viziñu hanesan Leimea Sorin Balu, Koliati Leten, Leimea Kraik no iha posibilidade bo’ot komunidade husi Sub-Distritu Letefoho mós sei hetan asesu husi konstrusaun ida ne’e.
Orgullu tebes ho involvementu komunidade iha suku ida ne’e liu-liu iha implementasaun programa PNDS iha sira nia Suku, no komunidade ida ne’e hatudu duni sira nia kapasidade katak mesmu ho subsídiu suku PNDS ne’ebé ki’ik sira konsege rezolve duni sa ida mak sai hanesan dezafia dezenvolvimentu iha suku ida ne’e, no fiar katak iha futuru mai suku ida ne’e sei dezenvolve di’ak liu tan ho programa PNDS.
Programa PNDS laos rezolve deit infraestrutura báziku ne’ebé komunidade hakarak, maibé iha programa ida ne’e fo mós kapasitasaun ba komunidade oin sá sira bele idéntifika rasik problema dezenvolvimentu ne’ebé komunidade enfrenta no ikus mai komunidade rasik mak implementa no sira rasik mak sei sai nain ba konstrusaun ne’ebe sira konstrui.
