Ponte Foun Ajuda Agrikultura ba Asesu Merkadu Lokál

Iha programa PNDS Komunidade suku Hoholau deside projetu infraestrutura mak sai hanesan prioridade as liu. Infraestrutura importante ne’ebé komunidade harii  husi orsamentu PNDS mak halo konstrusaun ponte ki’ik iha Aldeia Saharae.

Ponte Foun hanaran Ponte Kafe

Ponte Foun hanaran Ponte Kafe

“Ponte ne’e importante tebes tanba bele fasilita transporte públiku hodi tula produtu lokál husi komunidade ba asesu iha merkadu” hato’o husi Domingos da Silva hanesan mós prezidente Komisaun Planeamentu Akontabilidade (KPA). Nia hatutan katak : “Ponte ne’e mós importante atu fasilita labarik sira bele la’o ba mai-mai eskola iha tempu udan, tanba iha tempu udan mota ne’e boot la halimar”.

Ponte foun ne’ebé halo iha Suku Hoholau ajuda tebes komunidade husi aldeia  Saharai ho Aldeia Manubata, tanba aldeia rua ne’e produtivu tebes-tebes iha produtu lokál hanesan kafé, ai-farina, fehuk-midar, talas, kontas, ai-fuan nomós modo tahan.

Antes ponte foun seidauk harii, komunidade servisu hamutuk hodi lalin ai kakeu tula iha mota leten para bele la’o ba mai, no ponte ne’e sira hanaran Ponte ai kakeu. Maibé depois ponte ne’e harii no bele fasilita transporte públiku ba-mai, komunidade deside hodi troka naran ponte ne’e ba  Ponte kafé, tanba bele tula kafé ba iha merkadu.

Sentru Komunitaria multi propozitu

Sentru Komunitaria multi propozitu

Alende konstrusaun ponte, komunidade deside hodi halo mos sentru komunitáriu multi propózitu ida iha suku laran, tanba sentru ida ne’e bele sai hanesan  fatin sentrál ida atu halibur komunidade sira hodi simu programa husi governu hanesan fatin servisu integradu saudi komunitáriu ka Siska,  fatin ba ekstensionistas  atu halibur komunidade hodi fahe informasaun kona ba servisu agrikultura  nomós atividade relevante ne’ebé iha ligasaun ho ema barak ninia partisipasaun.

Subsídiu suku annual husi programa PNDS ba iha suku ida ne’e ho montante  US$45,000.00, orsamentu ne’e fahe ba fundus rua mak hanesan : fundus ba operasional iha $5,500.00, no fundus ba infraestrutura ho nia montante $39,500.00, fundus husi infraestrutura ne’e aloka ba konstrusaun ponte ho montante US$22,168.68, no ba konstrusaun sentru komunitáriu multi propózitu hamutuk iha US$17,313.32.

Suku Hoholau hanesan suku ida ne’ebé pertense husi Sub-Distritu Aileu Vila, Distritu Aileu. Suku ida ne’e implementa programa PNDS iha faze Pilotu.  Suku ida ne’e iha Aldeia 5 mak hanesan Aldeia Aslimhati, Hatulai, Manubata, Mau-Uluria no Saharai. Uma kain hamutuk 360 no  total populasaun iha 1600 resin mak hetan benefísiu husi projetu rua ne’e.