Vice Ministru da Administrasaun Estatál no Embaisadora Nova Zelandia Kongratula Estrutura PNDS ne’ebé Implementa ona Uma Polisia Suku (OPS) ho Kualidade Diak

Vice Ministru da Administrasaun Estatal loke Enkontru Avaliasaun Final ba Uma OPS iha Salaun Laline CNE, Dli.

Vice Ministru da Administrasaun Estatal loke Enkontru Avaliasaun Final ba Uma OPS iha Salaun Laline CNE, Dli.

Implementasaun Uma Ofisial Polisia Suku iha Suku sanulu resin hat iha territóriu Timor Leste ba Polisia Komunitariu hetan apoiu orsamentu husi doadores Governo Nova Zelandia ho montante Rihun Atus hat walu nulu resin walu, atus nen sia nulu resin ida virgula centavos rua nulu dolar  Amerikano ($488.691,20). Uma hirak ne’e finaliza no entrega ona ba Komando Polisia Nasional Timor Leste.

Iha avaliasaun final ba implementasaun uma OPS, Vice Ministro da Administrasaun Estatal, Abilio Caetano iha nia intervensaun  akresenta sentimento haksolok tamba ho konstrusaun uma ofisiál Polisia Suku bele hakbesik ona Prezensa Polisia iha komunidade nia le’et hodi ajuda serbisu Autoridade Lokal sira hanesan Chefe Suku, Chefe Aldeia no membros konselho suku bele tau matan ba komunidade ne’ebe moris iha suku no Aldeia.

Intervensaun Embasadora Nova Zelandia iha Enkontru Avaliasaun Final Uma OPS.

Intervensaun Embasadora Nova Zelandia iha Enkontru Avaliasaun Final Uma OPS.

Iha oportunidade ne’e mos Vice Ministro da Aministrasaun Estatal kongratula Diretora PNDS ho Estrutura tomak tantu husi nivel Nasional to’o iha Nivel Suku tamba implementa ona uma ba polísia Suku ho kualidade di’ak ho kustu ne’ebé kiik, tanba tereno realidade hatudu katak kualidade di’ak tebes no entermos kustu  la ultrapasa kustu real  ne’ebé iha.

Entretantu Embaisadora Nova Zelandia, Vicki Poole sente kontente tanba ho sistema ne’ebé PNDS uja bele konstrui uma ba polísia suku ho kualidade ne’ebé diak,no ida nee nudar pasu positivo hodi bele fasilita kna’ar polisia suku. Iha Oportunidade nee mos Embaisadora Nova Zelandia mos kongratula Estrutura PNDS tomak tanba ho sira hotu nia kontribuisaun no serbisu maka’as bele konstrui ona uma OPS hirak nee ho kualidade ne’ebe diak tebes.

Embaisadora iha esperansa katak iha futuru PNDS sei kontinua serbisu maka’as liu tan hodi kontribui ba dezenvolvimentu iha Timor Leste.

Atividade avaliasaun final ba implementasaun Uma OPS ne’ebé hala’o iha salaun Lalini CNE encera ho Diskusaun Grupo hodi rekomenda kestaun balun ne’ebé persija hadia iha futuru inklui entrega Livru Relatoriu final Programa Uma OPS husi Diretora PNDS, Dulce Guterres Junior ba Embaisadora Nova Zelandia, Vice Ministro da Administrasaun Estatal, Komandante Geral PNTL, Komandante PNTL Munisipiu sanulu resin rua (12) iklui komandante PNTL RAEOA.