Diretora Claudinha Soares Pinto, Avertura Sosializasaun Mata Dalan Implementasaun Programa Nasional Dezenvolvimentu Suku Faze 3 siklu III.
ST-PNDS hamutuk ho PNDS Munisipiu Dili hahú sosializa mata dalan implementasaun Programa Nasional Dezenvolvimentu Suku faze 3 siklu 3. Aktividade ne’e realiza iha Salaun Enkontro CNE, 27/04/2021.
Implementasaun Programa Nasional Dezenvolvimentu Suku faze 3 siklu 3 ba tinan 2021 sei foka liu ba rekuperasaun ekonomia hodi hadia infraestrutura basiku ne’ebe hetan estragus iha inundasaun ne’ebe akontese iha loron 04 Abril 2021 iha Teritoriu Nasional.
Partisipante Sira Antusiasmu Hodi Rona Intervesaun Husi Diretora PNDS, Claudinha Soares, Pinto, Konaba Sosializasaun Mata Dalan Implementasaun Programa Nasional Dezenvolvimentu Suku Faze 3 siklu III iha Salaun CNE, Dili.
Diretora Sekretariadu Tekniku PNDS, Claudinha Soares Pinto informa katak iha Munisipiu Dili implementasaun faze 3 siklu 3 ba tinan ida ne’e PNDS aloka orsamentu rihun Atus Walu resin ba implementasaun regular PNDS nia no sei responde mos ba kalamidade ne’ebe akontese hodi bele halo rekuperasaun ekonomia.
Hatan journalista GMN konaba prioridades infraestrutura basiku ida oinsá mak PNDS bele konstrui Diretora ne’e hateten, infraestrutura basiku ne’ebe PNDS bele fasilita hodi hadia hikas mak imfraestrutura basiku ne’ebe ho skala ki’ik iha seitor Saneamento, Agirikultura Dalan no Ponte ki’ik sira inklui Valeta hirak ne’ebe hetan estragus maibe depende ba prioridade husi komunidade sira rasik, PNDS so fasilita deit prosesu tomak ne’ebe liga ho implementasaun ne’e.
Entretantu xefe suku Manleuana, Jacob Soares ne’ebe partisipa mos iha sosializasaun ne’e hateten orsamentu ne’ebe aloka husi PNDS sei la sufisiente atu bele kobre estragus hirak ne’ebe hetan inundasaun fulan hirak liu ba, nune’e xefe suku Manleuana informa sei halo diskusaun ho conselho do suku atu bele hare prioridades saida maka persija atensaun urjente husi infraestrutura basiku ne’ebe hetan estragus.
