Sekretariadu Tékniku PNDS Realiza Enkontru Koordenasaun Hodi Ajusta Plano Global Implementasaun PNDS Normal ho Aktividade Adisional

Enkontru koordenasaun Sekretariado Tekniku Programa Nasional Dezemvolvimentu Suku (PNDS) iha fulan junu nian realiza iha Postu Administrativo Atauro, Munisipiu Dili, aktividade ne’e realiza iha Beloi Atauro , 27-29/06/2019.

Administrador Postu Atauru, Mateus Belo hato'o Benvindo ba Delegasaun ST-PNDS iha Atauru

Administrador Postu Atauru, Mateus Belo hato’o Benvindo ba Delegasaun ST-PNDS iha Atauru

Objetivo husi enkontru koordenasaun ne’e mak atu bele kordena diak liu tan servisu hotu ne’ebe ligado ho implementasaun rutina programa PNDS nian liu-liu foka ba implementasaun faze 3 ne’ebe sei implementa iha suku 202 iha territóriu Timor Leste. Alende diskute konaba plano global PNDS nian iha enkontru ne’e mos diskute konaba plano global atividade adisional rua seluk ne’ebe Ministeriu Administrasaun Estatal ho Ministeriu Edukasaun halo ona akordu atu implementa eskola sia inklui fatin halimar hamutuk 72 ne’ebe sei implementa iha suku hirak ne’ebe partense iha implementasaun faze 1 no 2.

Iha intervensaun Diretora Sekretariado Tekniku PNDS, Dulce Guterres Junior, apela ba kargu chefia husi Nasional to’o iha Nivel Munisipiu no funsionáriu PNDS Nivel Nasional atu haka’as an no mantein nafatin dixiplina hodi nune’e bele melhora liu tan servisu iha implementasaun Programa PNDS iha territóriu Timor-Leste, liu-liu implementasaun faze 3 siklus 2, inklui aktividade adisional husi Ministeriu Edukasaun konaba fatin halimar 72 no rehabilitasaun Eskola ne’ebe sei implementa iha suku hirak ne’ebe tama iha implementasaun faze 1 no faze 2, aktividade adisional rua ne’e Edukasaun fo fiar ba PNDS atu implementa uja sistema PNDS.

Entretantu Administrador Postu Atauro, Mateus Belo ne’ebe partisipa iha Sesaun abertura iha loron primeiru, apresia ho implementasaun programa PNDS, tanba implementasaun programa PNDS rejolve dadaun difikuldades balun ne’ebe komunidade sira enfrenta.

Diretora Nasional ST-PNDS, Dulce Guterres Junior Abertura Enkontru Kordenasaun iha Atauru

Diretora Nasional ST-PNDS, Dulce Guterres Junior Abertura Enkontru Kordenasaun iha Atauru

Iha enkontru ba loron daruak Diretor delegasaun PNDS Munisípiu aprezenta konaba plano aktividades kada Munisipiu nia hodi bele ajusta tuir plano global Nasional, enkuantu husi nivel Sekretariado, chefe Unidades no Departementus aprezenta rezultadu progresu servisu iha Nivel Nasional iha kestaun tranferensia fundus operasional no infraestrutura, kestaun lojistiku, sistema MIS husi M&E, rekursu humano konaba forsa trabalho.

Enkontru koordenasaun ne’e partisipa husi Koordenador PNDS husi Munisípiu 12 no RAOEA, Chefe Unidade, Chefe Departementu, Funsionáriu PNDS Nasional, Assessor Nasional no Internasional nomo’s ekipa Suporta Terrenu (Field Ajensia Team (FST)) husi ajénsia Cardno ne’ebe durante ne’e fo apoiu ba implementasaun Programa PNDS.