Ministru Administrasaun Estatal, Dr. Miguel Pereira de Carvalho, Ofisialmente Asina Plaka iha Inaugurasaun Konstrusaun Pre-Escolar Baura, Suku Leorema, Postu Bazartete, Munisipiu Liquisa.
Konstrusaun Pre-Escolar Baura, Suku Leorema, Postu Bazartete, Munisipiu Liquisa ho orsamentu husi governu ne’ebe aloka liu husi Programa Nasional Dezenvolvimentu Suku (PNDS). Konstrusaun ne’e ofisialmente inaugura husi Ministru Administrasaun Estatal no Vise Ministru Edukasaun, Joventude no Desportu ne’ebe Akompania husi Administrador Munisipiu Liquisa no asiste husi komunidade suku leorema. Atividade ne’e hala’o iha loron 07/08/2020.
Ministru Administrasaun Estatal Dr. Miguel Pereira de Carvalho, Akonpanya husi Vise Ministru Edukasaun, Joventude no Desportu no Administrador Munisipiu Liquisa Simbolu Tesi Pita Inaugurasaun Pre-Escolar Baura, Suku Leorema, Postu Bazartete, Munisipiu Liquisa.
Konstrusaun Pre-Escola Baura, Suku Leorema hanesan prekupasaun bo’ot ida ba inan no aman liu-liu estudante Pre-Escolar Baura iha suku Leorema, implementasaun ba konstrusaun Programa Dezenvolvimentu Suku iha suku Leorema ne’ebe implementa husi ekipa jestaun suku no komunidade hamutuk projeitu pakote ha’at maka hanesan, Pre-Escolar Baura, Moru/Redi Haleu Escola luan 21mx23m/483m2 nia aas 2m nomos iha adisional ba projeitu refere mak hanesan, konstrusaun MCK/haris fatin ho mediada 4×3 unidade ida no konstrusaun dada Be’e Mos ba Pre-Escolar ne’ebe uja Sistema bomba ho distansia 714m, ho total orsamentu ba projeitu iha suku leorema hamutuk $47.320,10 ne’ebe fahe ba orsamentu Infrastrutura $41.690,85 ho balansu $1.00 no ba orsamentu Operasional $5.629,25 ho balansu $8.04.
Ministru Administrasaun Estatal, Miguel Pereira de Carvalho iha nia intervensaun afirma bá komunidade iha suku Leorema Katak objetivu husi Programa PNDS mak atu fo oportunidade ba komunidade sira iha suku no Aldeia laran hodi bele partisipa iha prosesu Dezenvolvimentu, no Governu nia papel mak fó oportunidade bá komunidade sira oinsa atu partisipa iha prosesu Dezenvolvimentu sira, liu husi Programa PNDS hakbesik Dezenvolvimentu bá suku nune’e komunidade sira bele partisipa.
Ministru Administrasaun Estatal, Dr. Miguel Pereira de Carvalho, Vise Ministru Edukasaun, Joventude no Desportu, Administrador Munisipiu Liquisa, Diretora Actual PNDS Nasional no Estudante Pre-Escolar Baura Hasai Foto Hamutuk.
Ohin ita bele hare fatin aprendizasen pre-Eskola ne’e oin seluk ona iha mudansa tambá apoiu servisu husi komunidade rasik liu husi PNDS, no eskola ne’e fó benefisia bá alunus sira iha suku Leorema bele aproveita hodi útiliza ho diak bá aprendizasen nian, afirma Ministru Dr. Miguel Pereira de Carvalho.
PNDS halo tinan sia ona no ohin loron PNDS perkore bá (452) suku iha Teritoriu Timor-Leste, tambá PNDS kada tinan Governo Timor-Leste sempre aloka fundus provolta (40.000 – 50.000) mil bá Suku sira hodi hari’i projeitu Desenvolvimentu skala ki’ik sira hanesan dada bé mós, hari’i eskola, hadia estrada no sira seluk tan tuir pedidu husi komunidade rasik no PNDS mos servisu parseria ho governu Australia durante ne’e harii Infrastrutura skala kiik sira hamutuk ho komunidade iha sukus no Aldeias, ikus liu husi mensagen ministru, apela bá komunidade iha suku Leorema kontinua tau matan nafatin bá infraestrutura eskola ne’e, hodi labarik sira uza ba sira nia apredizajen no susesu bá sira nia futuru.
Partisipa iha inaugurasaun ba Konstrusan Escola Pre-Escola Infantil ne’e Ministru Administrasaun Estatal, Vise Ministru Edukasaun, Joventude no Desportu, Administratdor Munisipiu Liquisa, Administrador Postu Bazartete, Diretora Atual PNDS Nasional, Diretor Delegasaun PNDS Munisipiu Liquisa, Komandante Polisi Munisipiu Liquisa, Reprezentante Husi PARTISIPA, linhas Sektorais sira iha Munisipiu Liquisa, Chefe Sukus, no komunidade suku Leorema.
